Investorlarmen jumystyń qazirgi tásilderi sapaly ınvestıtsııa tartýǵa kedergi keltirip otyr — Toqaev
ASTANA. KAZINFORM — Elimizde uzaq merzimge arnalǵan ofteık-kelisimsharttar jasaýdyń biryńǵaı ári túsinikti erejesi joq. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
— Ashyǵyn aıtýymyz kerek, ınvestorlarmen jumystyń qazirgi tásilderi sapaly ınvestıtsııa tartýǵa kedergi keltirip otyr. Qaǵazbastylyq áli kóp, bir mindet birneshe organǵa qatar júktelgen. Men byltyrǵy Joldaýymda bul máselege arnaıy toqtaldym. Osyndaı tıimsiz jumysty doǵarý qajet. Mekemeler arasynda birtutas ári ózara kelisilgen baılanys júıesin qalyptastyrý kerek. Bir sózben, sheshim qabyldaý jáne úılestirý jumysy bir jerden júzege asyrylýy tıis. Sheshim qabyldaý úderisin sozýǵa bolmaıdy, ony tezdetý kerek, — dedi Memleket basshysy.
Prezıdent Investıtsııalyq shtab Roman Sklıardyń arqasynda óz jumysyn jalpy tıimdi atqaryp otyrǵanyn aıtty.
— Kóp nárse birinshi basshyǵa baılanysty. Olar ınvestıtsııalyq jobalardyń tıimdi júzege asyrylýyn qamtamasyz etýi tıis. Joba iske qosylǵannan keıin de ınvestorǵa qoldaý kórsete berý kerek. Jumys barysyna únemi monıtorıng júrgizip, ákimshilik kedergilerge jol bermeý qajet. Men ınvestıtsııalar máselesimen aınalysatyn arnaıy kómekshini taǵaıyndadym. Sheteldik nemese otandyq ınvestorlardyń suraqtary bolsa, Murat Nurtileýge Focal point retinde shaǵymdanýǵa bolady. Al halyqaralyq qarjy ınstıtýttarymen Strategııalyq josparlaý jáne reformalar agenttiginiń tóraǵasy — Prezıdenttiń keńesshisi Áset Erǵalıev baılanysta bolady, — dedi Qasym-Jomart Toqaev.
Memleket basshysynyń atap ótýinshe, ınvestıtsııalyq jobalardy júzege asyrýǵa múmkindik beretin mańyzdy tásildiń biri — uzaq merzimge arnalǵan ofteık-kelisimsharttar jasaý.
— Biraq qazir elimizde mundaı kelisimshart jasaýdyń biryńǵaı ári túsinikti erejesi joq. Onyń ústine, memlekettik organdar selqostyq tanytyp otyr. Sonyń saldarynan strategııalyq mańyzy bar birqatar ınvestıtsııalyq joba iske aspaı jatyr. Úkimet pen Básekelestikti qorǵaý jáne damytý agenttigine osy máseleni sheshý úshin tıimdi sharalar qabyldaýdy tapsyramyn, — dedi Prezıdent.
Buǵan deıin Prezıdent salyq júıesin jappaı tsıfrlandyrýǵa shuǵyl kirisken jón ekenin aıtqan edi.