Investorlarǵa júrgiziletin tekserýler 6%-ǵa qysqardy – Bas prokýratýra
ASTANA. KAZINFORM – Qazaqstanda «prokýrorlyq súzgi» tetigi men ınvestor-prokýrorlardyń jumysynyń nátıjesinde ınvestorlarǵa qatysty tekserýler men ákimshilik jaýaptylyqqa tartý jaǵdaılary azaıǵan.
Bas prokýratýranyń Investorlardyń quqyqtaryn qorǵaý komıteti málimetinshe, bıyl prokýratýra organdaryna ınvestorlarǵa qatysty memlekettik organdardyń 3 547 sheshimi kelip túsken. Olardyń qatarynda tekserýler, ákimshilik óndirister, shekteý jáne tyıym salý sharalary, sondaı-aq sot talap-aryzdary bar.
Komıtettiń prokýrorlyq súzgi basqarmasynyń bastyǵy Maqsat Oraqbaevtyń aıtýynsha, materıaldardy qaraý nátıjesinde prokýrorlar memlekettik organdardyń 620 sheshimin kelisýden bas tartqan.
– Investorlardyń quqyqtaryn qorǵaý tıimdiligi bıyl 18%-dy qurady. Salystyrý úshin aıtsaq, 2025 jyly bul kórsetkish 9% bolǵan, – dedi Maqsat Oraqbaev.
Onyń sózinshe, prokýrorlyq súzgi tetigi arqyly ınvestorlardyń quqyqtaryn shekteıtin birqatar sheshimderdiń joly kesilgen.
Máselen, memlekettik organdardyń biri formaldy sebeptermen ınvestorǵa 354 myń tonna daıyn ónimdi eksporttaýǵa lıtsenzııa berýden bas tartpaq bolǵan. Bul kelisimsharttyń buzylýyna jáne sheteldik seriktester tarapynan aıyppul salynýyna ákelýi múmkin edi. Alaıda prokýratýra aralasqannan keıin lıtsenzııa rásimdelip, ınvestor iri shyǵynnan qutylǵan.
Bıyl ınvestorlarǵa júrgiziletin tekserýler sany 6%-ǵa, al ákimshilik jaýaptylyqqa tartý faktileri 16%-ǵa qysqarǵan.
– Eger 2025 jyldyń alǵashqy tórt aıynda ınvestorlardyń 24%-yna tekserý júrgizilse, 2026 jyldyń osy kezeńinde bul kórsetkish 18%-ǵa deıin tómendedi, – dep atap ótti basqarma bastyǵy.
Sonymen qatar ákimshilik jaýaptylyqqa tartylǵan ınvestorlar sany da azaıǵan. Mysaly, Almaty qalasynda memlekettik organ ınvestorǵa aıyppul salmaq bolǵan. Tekserý barysynda jaýapkershilikke tartý merziminiń ótip ketkeni anyqtalyp, prokýratýra ınvestorǵa 2 mln teńge kóleminde zańsyz aıyppul salý áreketiniń jolyn kesken.
Qadaǵalaý organynyń málimetinshe, «prokýrorlyq súzgi» tetigi bıznesti negizsiz qysymnan jáne ákimshilik kedergilerden qorǵaýdyń tıimdi quraly retinde óz nátıjesin kórsetip keledi.
Aıta keteıik, buǵan deıin Jambyl oblysynda ınvestorǵa tıesili jer basqa adamǵa zańsyz berilgeni habarlandy.
