Investorlarǵa qyzmet kórsetý ortalyǵyn qurý qajet - Qasymbek
ASTANA. QazAqparat - Elimizde ınvestorlarǵa qyzmet kórsetý ortalyǵyn qurý qajet. Mundaı usynysty búgin Úkimettiń selektorlyq rejımdegi otyrysynda QR Investıtsııalar jáne damý mınıstri Jeńis Qasymbek jasady, dep habarlaıdy QazAqparat.
«Jalpy ınvestorlar Qazaqstannyń salyqtyq jáne kedendik zańnamasyn oń baǵalap otyr. Osyǵan oraı, salyq salý boıynsha Qazaqstannyń kórsetkishi tómendegeni týraly aıta ketken jón. Biz muny salyq jınaýǵa qatysty saıasattyń qataldyǵymen jáne zań normalaryn túsindirýdiń ekiushtylyǵy problemalarymen jáne salyqtyq ákimshilendirý sııaqty basqa da máselelermen baılanystyramyz. Investorlardyń atap ótýinshe, negizgi másele, bul salyq tólemegeni úshin qylmystyq jaýapkershilik shegi aıtarlyqtaı tómen. Osyǵan baılanysty, salyqtyq jáne kedendik zańnamany dekrımınalızatsııalaý jáne shekti kóterý usynylady»,- dedi mınıstr.
Sondaı-aq, Qasymbek ınvestorlardyń aldaǵy ýaqytta kólemdi aıyppul men jazalaýdan qutylýlary úshin halyqaralyq keńesshilerdiń usynysy boıynsha salyq organdary tarapynan aqyly jáne aqysyz bıznes-keńes tájirıbesin engizý qajet dep esepteıtindigin atap ótti.
«Investorlar úshin aımaqtarda túrli qujattardy alý úshin ákimshilik kedergiler - júıeli problemalardyń biri bolyp otyr. Osyǵan baılanysty, «Kazneks Invest» Ulttyq agenttiginiń jumysyn qaıta qurylymdap, onyń janynan aımaq fılıaldarymen birge tolyqqandy Investorlarǵa qyzmet kórsetý ortalyǵyn qurý qajet, dep esepteımiz», - dedi ol.
