Investorlarǵa qoldaý joq: Saparbaev Kásipkerlik basqarmasynyń jumysyn synady
TARAZ. QazAqparat –Jumys isteýge nıetti kásiporyndarǵa basqarma men jaýapty qurylymdar tarapynan qoldaý joq. Búgin Jambyl oblysynyń ákimi Berdibek Saparbaev apparattyq keńes ótkizip, Kásipkerlik jáne ındýstrıaldy-ınnovatsııalyq damý basqarmasynyń jumysyna qatysty syn aıtty, dep habarlaıdy QazAqparat.
Oblys ákimdiginiń resmı saıtynda málim etilgendeı, keńes barysynda óndiris pen tutyný arasyndaǵy tepe-teńdikti saqtaý, veterınarlyq qaýipsizdik jáne ıdeologııalyq jumystar barysy qaraldy.
B.Saparbaev Kásipkerlik jáne ındýstrıaldy-ınnovatsııalyq damý basqarmasy basshysynyń mindetin atqarýshy Jandáýlet Kenjebekovtiń baıandamasyn ortasynan toqtatýǵa májbúr boldy.
«Maǵan basqa salalardaǵy shyǵyndarymyzdy almastyratyn ónim túrlerine taldaý qajet. Paıdaly qazbalar boıynsha zerdeleý sharalaryn uıymdastyryp, olardy ıgerý úshin ınvestorlardy jedel tartý qajet. Kóptegen kásiporyndar jumys isteýge, ónim kólemin arttyrýǵa nıet bildirip otyr, alaıda basqarma men basqa da jaýapty qurylymdar tarapynan qoldaý joq. Sizdiń basty mindetimiz –ındýstrııany, kásipkerlikti damytý máselelerimen aınalysý.
Daǵdarys – bul jańa múmkindikter ýaqyty, ony paıdalanbaý aqymaqtyq bolar edi. Óndiris pen tutyný arasyndaǵy balansty júzege asyrý joldaryn izdeý, óndiristik kúshterdi ornalastyrý shemasyn qurý qajet. Ekonomıkada jeńil, tamaq jáne qaıta óńdeý ónerkásibiniń úlesin arttyrý joldaryn oılastyrý kerek», - dedi aımaq basshysy.
Atap ótilgendeı, memlekettik satyp alý boıynsha ótkiziletin konkýrstardy negizinen jergilikti kásiporyndar utýda. Bul tek ekonomıka úshin ǵana emes, áleýmettik sala úshin de oń áser etip otyr. Salyq jergilikti bıýdjetke túsedi, al jańa jumys oryndarynda jergilikti turǵyndar eńbek ete bastaıdy.
«Tek bıýdjetke ǵana qarap otyrýǵa bolmaıdy, basqa da qarjylandyrý kózderin belsendi túrde izdestirý kerek. Demeýshilermen jumys isteý, tikeleı ınvestıtsııalar tartý, memlekettik-jekemenshik áriptestikti damytý. Aýdan ákimderi sharýa qojalyqtarynyń mıneraldyq tyńaıtqyshtaryn satyp alýy, óndiriletin asfalttyń, basqa da qurylys materıaldarynyń sapasyn baqylaýda ustaýy qajet. Barlyq jaǵdaı jasalǵan, aqsha aýdaryldy, tek jumys isteńizder. Men salynyp jatqan nysandardyń sapasyn jeke ózim tekseretin bolamyn.
Bos jınalystardyń sanyn qysqartyp, kásiporyndarǵa jıi barý kerek. Jaýapty tulǵalar tarapynan berilgen tapsyrmalardyń iske asyrylýyna taldaý men baqylaý az», - dep atap ótti Berdibek Saparbaev.
Sondaı-aq Aýyl sharýashylyǵy basqarmasynyń basshysy Berik Nyǵmashev baıandama jasap, un, makaron, jumyrtqa jáne sary maı óndirisin eki esege ulǵaıtý úshin jergilikti resýrstar jetkilikti ekendigin atap ótti. Bir aı ishinde qaıta óńdeý kásiporyndarynyń áleýetine monıtorıng júrgizilip, azyq-túlik taýarlaryn óndirý men tutyný arasyndaǵy balansty saqtaý jóninde usynystar ázirlenbek.
Óńir basshysy kókónis saqtaý qoımalarynyń jaı-kúıine zerdeleý júrgizýdiń mańyzdylyǵyna toqtalyp, qajet bolǵan jaǵdaıda memlekettik-jekemenshik áriptestik negizinde jańa qurylys salý kerektigine kóńil bóldi. Bul jumystarǵa tartý úshin bıznes ókilderi arasynda túsindirý jumystaryn júrgizý qajet. Aýdan ákimderi tıisti jer telimderin barynsha qysqa merzimde bólýdi qarastyrǵany abzal.
Ekonomıka jáne bıýdjettik josparlaý basqarmasynyń basshysy Gúldana Jaýynbekova habarlaǵandaı, aǵymdaǵy jyldyń birinshi toqsanynyń qorytyndysy boıynsha tamaq ónerkásibi 47,4 paıyz, hımııa ónerkásibi 8,8 paıyzǵa tómendegen. Birinshi jaǵdaıdaǵy quldyraý kórsetkishi qant zaýyttaryn toqtaıyna baılanysty oryn alǵan.
Baıandamashy joǵaryda atalǵan salalardaǵy shyǵyndardyń ornyn tolyqtyra alatyn ónimderdiń tizbesi men kólemin tilge tıek etip, sonyń ishinde qurylys, qurylys materıaldary men metaldar óndirisine nazar aýdartty.
