Investorlarǵa qoldaý kórsetetin Kazakhstan Investment House ashylady
ASTANA. KAZINFORM – Kazakh Invest kompanııasynyń sheteldik ókildikteriniń sany ulǵaıtylady. Bul týraly Qazaqstan-Túrkııa ınvestıtsııalyq dóńgelek ústel otyrysynda Premer-mınıstr Oljas Bektenov aıtty.
– Túrik bıznesimen seriktestikti odan ary damytýǵa jáne ınvestıtsııalyq qarym-qatynasty barynsha keńeıtýge múddelimiz. Bul úshin bizde qajetti resýrstar men múmkindikter jetkilikti. Osy rette Qazaqstan Úkimeti óz tarapynan barlyq qajetti qoldaýdy kórsetýge daıyn ekendigin atap ótkim keledi, - dedi Oljas Bektenov.
Premer-mınıstr Qazaqstan Prezıdentiniń tapsyrmasymen jańa ınvestıtsııalyq tsıkl iske qosý jáne sapaly ınvestıtsııa kólemin arttyrý boıynsha sharalar júrgizilip jatqanyn aıtty.
– Osy mindetterdi oryndaý úshin Qazaqstan Úkimeti 2030 jylǵa deıingi ınvestıtsııalyq saıasat tujyrymdamasyn qabyldady. «Báıterek» AQ-y ulttyq ınvestıtsııalyq holdıngke transformatsııalanyp, onyń quramynda Investment Board jumysyn bastady. Investıtsııalardy odan ary tartýdy kúsheıtý maqsatynda Kazakh Invest kompanııasynyń jumys júrgizý aımaǵyn keńeıtip, sheteldik ókildikteriniń sanyn ulǵaıtamyz. Sondaı-aq bir tereze qaǵdıaty boıynsha ınvestorlarǵa qyzmet kórsetý men qoldaýdyń biryńǵaı aqparattyq ortalyǵy Kazakhstan Investment House ashylatyn bolady, - dedi ol.
Premer-mınıstr sheteldik bınes ókilderiniń senimin kúsheıtý maqsatynda olardyń quqyqtaryn qorǵaý úshin Bas prokýratýra janynda arnaıy komıtet qurylǵanyn jáne Bas prokýrorǵa ınvestıtsııalyq ombýdsmen quzireti berilgenin aıtty.
– Budan bólek kásipkerler úshin qolaıly orta qalyptastyrý aıasynda Úkimet janynda Investıtsııalyq shtab jumys isteýde. Ótken jyldyń qorytyndysy boıynsha atalǵan shtab arqyly jalpy quny 115 mlrd dollardy quraıtyn 212 jobanyń problemalyq máseleleri óz sheshimin tapty, - dedi Oljas Bektenov.
Aıta keteıik, búgin Túrkııa Vıtse-prezıdenti Jevdet Iylmaz ben Premer-mınıstr Oljas Bektenovtiń qatysýymen Saýda-ekonomıkalyq yntymaqtastyq jónindegi komıssııanyń 14-otyrysy ótti. Іs-shara barysynda Oljas Bektenov Qazaqstannyń Túrkııamen tyǵyz yntymaqtastyqqa daıyn baǵyttaryn atady.
