Investorlarǵa Alataýda halyqaralyq standartqa saı mektep pen aýrýhana salýǵa ruqsat beriledi
ASTANA. KAZINFORM — Investorlarǵa Alataýda halyqaralyq standartqa saı mektep pen aýrýhana salýǵa ruqsat beriledi. Bul týraly Premer-mınıstrdiń orynbasary Qanat Bozymbaev aıtty.
Alataý qalasynyń mártebesine qatysty konstıtýtsııalyq zań jobasyn talqylaý ótip jatqan Parlament palatalarynyń birlesken otyrysynda Májilis depýtaty Maksım Rojın vıtse-premerden: «Zań jobasynda bilim berý jáne medıtsına salalaryn retteý kózdelgen. Osy rette memlekettik bilim berý jáne medıtsına mekemeleri qalaı retteledi? Osy jaǵdaıda bilim berý jáne medıtsınada memlekettik jalpyǵa ortaq standarttar saqtala ma? — dep suraǵan edi.
Saýalǵa jaýap bergen vıtse-premerdiń aıtýynsha, Alataý qalasynda mektepter, ýnıversıtetter, aýrýhanalar jáne emhanalar Qazaqstan zańnamasyna sáıkes jumys isteıdi.
— Jańa konstıtýtsııalyq zańnyń 3-babynda memlekettik bilim berý standarttary barlyq oqý oryndarynda mindetti ekeni tikeleı kórsetilgen. Al medıtsına salasy týraly standarttar osy zań jobasynyń 43-babyna sáıkes, Qazaqstan standarttarynyń deńgeıinen tómen bolmaýy kerek. Eger jeke ınvestor kelip, halyqaralyq deńgeıdegi mektep, halyqaralyq deńgeıdegi ýnıversıtet fılıalyn salyp beremin dese, AQSh-tan ne Ońtústik Koreıadan ınvestor kelip, úlken aýrýhana salyp beremin dese, halyqaralyq standarttarǵa saı qurylysqa ruqsat beremiz, — dedi Qanat Bozymbaev.
Aıta keteıik, konstıtýtsııalyq zań kúshine engennen keıin Alataýdyń óńirlik jalpy ónimi 50 mlrd dollarǵa jetýi múmkin.
