Investorlardyń ózderi sotta isti qaraý merzimin uzartýdy suraıdy - Joǵarǵy Sot

ASTANA. QazAqparat - Qazirgi zańnama aıasynda ınvestorlardyń aryz-shaǵymdary sotta qysqa ýaqyttyń ishinde qaralýy qajet. Negizgi maqsat - sheteldik ınvestorlardyń quqyqtaryn barynsha qorǵaý, sot tóreliginiń ádilettiligin kórsetý. Alaıda olardyń ózderi sotta isti qaraý merzimin uzartýdy surap otyr, dep xabarlaıdy QazAqparat tilshisi.

QR Joǵarǵy Sottyń mamandyrylǵan sot alqasynyń tóraıymy Aıgúl Qydyrbaevanyń aıtýynsha, búgingi tańda ınvestıtsııalyq daýlar birinshi ınstantsııada bir aı jáne ekinshi ınstantsııada týra sondaı ýaqytta qaralýy qajet. «Árıne, munyń bári ınvestorlardyń quqyqtaryn shuǵyl túrde qorǵaý úshin jasaldy. Alaıda ınvestordyń ózi sotqa daıyndalý úshin ýaqytty kóbirek berýdi surap otyr. Biz bolsaq, ol ýaqyttyń tyǵyz ekenin alǵa tartyp, san alýan qaǵazdardy surap otyramyz. Investorlar bolsa, tıisti qujattardy ázirlep, sot otyrysyna daıyndalyp úlgermeıdi. Sondyqtan biz ınvestıtsııalyq daýlardy eki ınstantsııada da qaraý merzimin uzartýdy usynyp jatyrmyz. Sebebi aryz-shaǵymdardyń basym bóligi memlekettik kirister komıtetiniń salyqqa qatysty eskertýlerin daýlaýǵa baılanysty. Ondaı jaǵdaıda biraz qujat jınaý qajet. Al osy saladaǵy isterdiń qalyńdyǵy on tomǵa deıin jetip jatady», - dedi Qydyrbaeva ınvestıtsııalyq daýlardy qaraýǵa arnalǵan búgingi jıyn barysynda.
Jalpy, ótken jyly Joǵarǵy Sottyń qaraýyna ınvestıtsııalyq daýlarǵa qatysty 22 aryz túsken bolatyn. Sonyń basym bóligi - munaı-gaz salasyndaǵy jumys isteıtin iri ınvestorlar. Olar kóp jaǵdaıda memlekettik organdardyń tarapynan jiberilgen salyq máselelerin daýlaıdy .
Búgingi otyrysta Joǵarǵy Sottyń sýdıalary Kásipkerlik kodekstiń birqatar normalarynyń jetildirýdi usyndy .