Investorlardyń jumys oryndaryn qurýǵa qatysty jaýapkershiligin arttyrý kerek — Úkimet

ASTANA. KAZINFORM — Jas mamandardy jumysqa ornalastyrýǵa basa nazar aýdarý kerek. Bul týraly búgin Úkimet otyrysynda Premer-mınıstr Oljas Bektenov málim etti.

— Jumys oryndaryn qurýdyń sapaly monıtorıngin qamtamasyz etý úshin Innovatsııalyq jobalar navıgatory ázirlendi. Aqparattyq júıe jańa jumys oryndarynyń sanyn, olardyń eńbek naryǵynyń qajettilikterine sáıkestigin, sondaı-aq jumys berýshilerdiń jumyspen qamtý josparlarynyń oryndalýyn qadaǵalaıdy. Sheteldik jáne otandyq ınvestorlardyń jańa jumys oryndaryn qurý boıynsha óz mindettemelerin oryndaý baǵytyndaǵy jaýapkershiligin arttyrý kerek. Sondaı-aq ınvestıtsııa kóleminiń eń kemi 30 paıyzyn quraıtyn eńbekaqy tóleý qoryn qalyptastyrý talabyn saqtaý qajet. Navıgatorda salalar boıynsha iri ınvestıtsııalyq jobalar ǵana kórinis tapqan, — dedi Oljas Bektenov.

Onyń aıtýynsha, jańa jumys oryndaryna naqty ýaqyt rejıminde tolyq ári júıeli túrde monıtorıng júrgizý úshin biryńǵaı aqparattyq júıe qajet. Ol elimizde iske asyrylyp jatqan jobalar týraly barlyq aqparatty, sonyń ishinde biliktilik deńgeıin, eńbek jaǵdaılaryn, jalaqy mólsherin jáne basqa da derekterdi qadaǵalap otyrýǵa tıis.

— Sonymen qatar elimizde ashylatyn jumys oryndarynyń bir bóligi — ýaqytsha jumyspen baılanysty. Mundaı tásildiń tıimdiligi tómen. Sondyqtan qoldanystaǵy josparlarda turaqty jumyspen qamtý úlesin ulǵaıtý qajet. Ásirese, jas mamandardy jumysqa ornalastyrýǵa basa nazar aýdarý kerek. Atalǵan máselelerdi keshendi túrde sheshýge baǵyttalǵan sharalar eńbek naryǵyn damytý tujyrymdamasynda kózdelgen, — dedi Úkimet basshysy.

Budan buryn habarlanǵandaı, sýbsıdııalanatyn jumys oryndaryn iske asyrý tártibine ózgeris engizilip jatyr.