Investorlardyń quqyqtaryn qorǵaý komıteti óńirlerdegi jumysty kúsheıtip jatyr
ALMATY. KAZINFORM – Bas prokýratýranyń Investorlardyń quqyqtaryn qorǵaý komıtetiniń tóraǵasy Baýyrjan Eraly men Almaty oblysynyń prokýrory Berik Adamov óńir ınvestorlarymen birlesken qabyldaý ótkizdi. Kezdesý barysynda kásipkerler jer telimderin berý, ınfraqurylymǵa qosylý jáne memlekettik portaldarda tirkelý máselelerin kóterdi. Barlyq ótinish prokýratýra organdarynyń baqylaýyna alyndy.
Alǵashqylardyń biri bolyp «ABDI AGRO» JShS basshysy Erjan Ábdıevtiń máselesi qaraldy. Kásipker 1,5 myń bas iri qara malǵa arnalǵan ferma salý úshin jer telimin alý boıynsha quqyqtyq kómek surady. Bul is prokýrorlardyń erekshe baqylaýyna alynyp, qoldaý kórsetilip jatyr.
Sonymen qatar prokýrorlar qazaqstandyq taýar óndirýshiler portalynda tirkelý kezinde qıyndyqtarǵa tap bolǵan «SL Grýpp» JShS-nyń, sýsyn shyǵaratyn zaýyt qurylysy úshin elektr jelisine qosylýǵa kómek qajet etetin «Caspian Beverage Holding» AQ-nyń, sondaı-aq jer máselesine qatysty «SAN tyres» JShS men «CSI Brands» JShS-nyń ótinishterin qabyldady.
Baýyrjan Eralynyń málimdeýinshe, Almaty oblysy elimizdegi ınvestıtsııalyq jobalar sany boıynsha aldyńǵy qatarly óńirlerdiń biri sanalady.
– Investorlardyń quqyqtaryn qorǵaý baǵytynda júıeli jumys júrgizilýde. Sońǵy úsh jylda kásipkerlerge qatysty qylmystyq ister sany 71,5 paıyzǵa azaıdy. Qazirgi ýaqytta prokýratýra jalpy quny shamamen 100 trıllıon teńgeni quraıtyn 3 myńǵa jýyq ınvestıtsııalyq jobany qoldap otyr. Almaty oblysynda quny 8 trıllıon teńgeden asatyn 180-nen astam ınvestıtsııalyq joba júzege asyrylýda. Bıyl óńir prokýrorlary 19 ınvestordyń quqyqtaryn qorǵady. Sondyqtan óńirdegi ınvestorlarmen tikeleı kezdesip, olardyń máselelerin jedel sheshý mańyzdy, - dedi komıtet tóraǵasy.
Vedomstvo basshysy 2024 jyly Prezıdenttiń tapsyrmasy boıynsha prokýrorlar mańyzdy ınvestıtsııalyq jobalardy qoldaýdy bastady jáne ınvestıtsııalardy qorǵaýdy qamtamasyz etýde ekenin atap ótti.
– Mindetimiz – eldegi bıznes júrgizý men ınvestıtsııa salý úderisin barynsha ashyq ári túsinikti etý. Osy jumys aıasynda 2 myńnan astam ınvestordyń máselesi sheshilip, 30 myń jumys ornyn qurýǵa múmkindik bergen 270 joba iske qosyldy, - dedi Baýyrjan Eraly.
Almaty oblysynyń prokýrory Berik Adamov óńir prokýratýrasy bızneske qoldaý kórsetý jáne ınvestorlardy qorǵaý jumystaryn kúsheıtkenin aıtty.
– Keıingi úsh jylda prokýrorlar jalpy ınvestıtsııa kólemi 4 trıllıon teńgeden asatyn shamamen 140 ınvestorǵa qatysty 70-ten astam máseleni sheshti. Negizgi máseleler – jer berý, ınjenerlik kommýnıkatsııalarǵa qosylý, sheteldik jumys kúshin tirkeý, shekteýler qoıý jáne zańsyz tekserýler, - dedi ol.
Komıtet tóraǵasy Almaty oblysyna jumys sapary aıasynda óńirdi damytý ortalyǵynyń, ındýstrııalyq aımaqtardy basqaratyn kompanııalardyń, Alatau arnaıy ekonomıkalyq aımaǵynyń jáne Carlsberg zaýytynyń qyzmetimen tanysty.
Buǵan deıin prokýratýra zańsyz memlekettik satyp alýdyń jolyn keskenin jazǵan edik.
