Investorlardyń quqyǵyn qorǵaý komıteti ekonomıkalyq ósimniń júıeli quralyna aınalady – Berik Asylov

ASTANA. KAZINFORM – Bas prokýror Berik Asylov 2025 jyly atqarylǵan jumystardy qorytyndylaı kelip, zańsyz ıemdelgen aktıvterdi qaıtarý jónindegi komıtettiń ornyna qurylǵan jańa organnyń memleketke tıgizetin paıdasyna toqtaldy.

- Qadaǵalaý jáne tergeý organdary qyzmetin úılestirý sharalarynyń nátıjesinde bızneske qatysty bastalǵan qylmystyq ister sany eki esege azaıdy. Investorlardyń quqyǵyn qorǵaý komıtetin qurý arqyly bul baǵyttaǵy jumys jańa deńgeıge shyǵyp, ol ınvestıtsııalyq qaýipsizdikti qamtamasyz etýdiń jáne ekonomıkalyq ósimdi kúsheıtýdiń júıeli quralyna aınalady, - dedi Berik Asylov.

Bas prokýror ınvestıtsııalyq jobalardy zańsyzdyqtardan qorǵaýdyń naqty mysaldaryna toqtaldy. 

- Máselen, Mańǵystaý oblysynyń prokýratýrasy «Aktau Mall» JShS ınvestorynyń ótinishin qarap, ınfraqurylym tartýǵa jáne nysandy paıdalanýǵa berýge baılanysty 3 problemany sheshti. Qabyldanǵan sharalar 20 mlrd teńge kólemindegi ınvestıtsııa tartý arqyly 1 500 jumys ornyn qurýǵa baǵyttalǵan. Astana qalasynyń prokýratýrasy Ónerkásip jáne qurylys mınıstrliginiń «Orbis Heavy Machinery» JShS-men KIA brendindegi arnaıy avtokólikterdi shyǵarý jónindegi kelisim jasasýyna quqyqtyq súıemeldeý uıymdastyrdy. Joba aıasynda ınvestıtsııa kólemi 5,5 mlrd teńgeni quryp, 150 jumys orny qurylatyn bolady. «Almaty Museum of Arts» QQ ınvestorynyń ótinishi boıynsha Almaty qalasynyń prokýratýrasy ýákiletti organnyń zańsyz áreketteriniń jolyn kesti. Atalǵan organ ruqsattyń bolýyna qaramastan abattandyrý jumystaryn zańsyz toqtatyp, aǵash kesýge arnalǵan quraldardy alyp qoıǵan, - dedi ol.

Buǵan deıin prokýratýra jeke sot oryndaýshylarynyń jasyrǵan tabysyn anyqtap, qosymsha salyq óndirgenin jazǵan edik.