Investorlardyń quqyǵyn buzǵan 40-tan astam tabıǵı monopolııa sýbektisi jaýapqa tartyldy
ASTANA. KAZINFORM - Bas prokýratýranyń Investorlardyń quqyqtaryn qorǵaý komıteti kásipkerlerge qoıylǵan zańsyz talaptardyń kúshin joıýǵa, tehnıkalyq sharttardy berýdi tsıfrlyq formatqa kóshirýge jáne ınjenerlik jelilerdiń bos qýattary týraly aqparattyń ashyqtyǵyn qamtamasyz etýge qol jetkizdi.
Bas prokýratýranyń baspasóz qyzmetiniń habarlaýynsha, prokýrorlyq qadaǵalaý nátıjesinde 1 294 ákimshilik is qozǵalyp, salynǵan aıyppuldardyń jalpy somasy shamamen 220 mln teńgeni qurady.
Injenerlik jelilerge qosylý – ınvestıtsııalyq jobalardy iske asyrýdyń negizgi kezeńderiniń biri. Alaıda is júzinde kásipkerler qosymsha kelisý rásimderine, tehnıkalyq sharttardy berýden negizsiz bas tartýǵa jáne qoljetimdi qýattar týraly ashyq aqparattyń bolmaýyna tap bolady.
Investorlardyń quqyqtaryn qorǵaý komıteti júrgizgen taldaý bul salada kóptegen zańbuzýshylyq pen júıeli máseleler bar ekenin kórsetti.
Zańsyz kelisý rásimderiniń kúshi joıyldy
Elimizdiń iri qalalarynyń birinde ınvestorlar ınjenerlik jelilerge qosylýǵa tehnıkalyq sharttar alý kezinde qosymsha ákimshilik kedergige tap bolǵan. Atap aıtqanda, olardan jergilikti atqarýshy organmen aldyn ala kelisý talap etilgen. Mundaı talap zańnamada kózdelmegen jáne birneshe jyl boıy kásipkerlerge negizsiz kedergi keltirip kelgen. Komıtettiń bastamasymen zańsyz tájirıbeniń joly kesilip, qosymsha kelisý talaby joıyldy.
Bos qýattar týraly aqparatqa qoljetimdilik qamtamasyz etildi
Taǵy bir másele – ınjenerlik jelilerdiń tehnıkalyq múmkindikteri týraly ózekti ári ashyq málimetterdiń bolmaýy.
2023 jyldan bastap tabıǵı monopolııa sýbektileri óz jelileri men qoljetimdi qýattary týraly aqparatty «Memsaraptama» RMK-nyń Geoportalynda ornalastyryp, únemi jańartyp otyrýǵa mindetti bolatyn. Bul málimetter ınvestorlarǵa jer ýchaskesin tańdaý jáne óndiristi josparlaý kezeńinde qajet.
Alaıda júrgizilgen taldaý kóptegen monopolıstiń bul talapty oryndamaǵanyn, al jekelegen kásiporyndardyń ashyq aqparatqa qoljetimdilikti negizsiz shektegenin kórsetti.
Komıtettiń aralasýynan keıin zańbuzýshylyqtar joıyldy. Málimetterdi jarııalamaǵany nemese ýaqytyly jańartpaǵany úshin 40-tan astam tabıǵı monopolııa sýbektisi ákimshilik jaýaptylyqqa tartyldy.
Tehnıkalyq sharttar tek tsıfrlyq formatta beriledi
Jumystyń taǵy bir baǵyty – ruqsat qujattaryn alý kezinde «bir tereze» qaǵıdatynyń tolyqqandy jumys isteýin qamtamasyz etý.
2018 jyldan bastap bul tetik tehnıkalyq sharttarmen birge jobalaýǵa ruqsat alý múmkindigin qarastyrady. Alaıda tekserý barysynda jekelegen monopolısterdiń áli de kedergi keltirip otyrǵany anyqtaldy. Olar tehnıkalyq sharttardy berýden bas tartyp, qaǵaz túrindegi ótinimderdi qabyldaǵan jáne kásipkerlerdi ózderine tikeleı júginýge májbúrlegen.
Osy jyldyń 11 shildesinen bastap tehnıkalyq sharttar tek Geoportal arqyly berilýi tıis bolatyn. Soǵan qaramastan, keıbir kásiporyndar jumysyn tsıfrlyq júıeden tys jalǵastyrǵan, al jekelegen tabıǵı monopolııa sýbektileri onda múldem tirkelmegen.
Qabyldanǵan sharalardyń nátıjesinde tsıfrlyq formatqa kóshý jumysy jandandy. Búginde tehnıkalyq sharttar beretin 426 tabıǵı monopolııa sýbektisiniń 424-i Geoportalda avtorızatsııadan ótti. Ótinimder tsıfrlyq júıe arqyly qaralady.
Sonymen qatar Komıtettiń bastamasymen memlekettik tabıǵı monopolııa sýbektileri basshylarynyń derbes jaýapkershiligi kúsheıtildi. Endi ınvestorlarǵa tehnıkalyq sharttar berýden bas tartý týraly sheshimderge memlekettik kásiporyndardyń birinshi basshylary qol qoıýy tıis.
Mundaı tájirıbe «Astana-Teplotranzıt» AQ, «Astana-REK» AQ jáne «Astana Sý Arnasy» MKK-da engizildi. Osyǵan uqsas ózgerister búkil el boıynsha memlekettik tabıǵı monopolııa sýbektileriniń reglamentterine engizilip jatyr.
