Investorlar múddelerin qorǵaıtyn ınvestıtsııalyq ombýdsmen ınstıtýty engiziledi
ASTANA. QazAqparat - Búgin Parlament Senaty Qarjy jáne bıýdjet komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» zań jobasy talqylandy.
Eske salaıyq, zań jobasy Memleket basshysy N.Nazarbaevtyń Úkimetke bergen tapsyrmalaryn oryndaý maqsatynda daıyndalǵan. Atap aıtqanda, Elbasy ınvestorlar úshin negizgi ınvestıtsııalyq kelisimder bolatyn jańa yntalandyrý paketin engizýdi, ınvestıtsııalyq kelisimderdi múltiksiz oryndaýdy, osy saladaǵy zańnamanyń turaqtylyǵyn qamtamasyz etýdi júktegen bolatyn.
Osyǵan baılanysty zań jobasy ınvestıtsııalyq ahýaldy jaqsartý, osy baǵyttaǵy qyzmetterdi yntalandyrý, ınvestıtsııalyq kelisimsharttar jasaý arqyly ınvestıtsııalyq preferentsııalar usyný tetigin qamtamasyz etýge baǵyttalady. Budan bólek, qyzmettiń basym túrlerinde ınvestıtsııalyq jobany júzege asyratyn ınvestorlarǵa memlekettik qoldaý sharalaryn kórsetý kózdeledi. Investorlardyń qujattardy jınaý men daıyndaýǵa qatysýyn azaıtý, sondaı-aq olardyń memlekettik qyzmetter kórsetý sýbektilerimen tikeleı baılanysyn shekteý maqsatynda «bir tereze» qaǵıdasy da engiziledi. Sonymen birge ınvestorlardyń quqyqtary men múddelerin qorǵaýdy qamtamasyz etý maqsatynda «ınvestıtsııalyq ombýdsmen» ınstıtýty engizilmek.
Ekonomıka jáne bıýdjettik josparlaý vıtse-mınıstri Marat Qusaıynovtyń aıtýynsha, zań jobasynda jasalatyn kelisimsharttar sheńberinde ınvestorlardy memlekettik qoldaýdyń qosymsha sharalary qarastyrylǵan. Atap aıtqanda, 10 jylǵa korporatıvtik tabys salyǵyn tóleýden bosatý, 10 jylǵa jer salyǵyn tóleýden bosatý, 8 jylǵa jyljymaıtyn múlik salyǵyn tóleýden bosatý kózdeledi. Al, nysan paıdalanýǵa berilgennen keıin memleket tarapynan ınvestorlardyń kúrdeli shyǵyndaryn 30 paıyzǵa deıin óteý qarastyrylǵan. Sonymen qatar, jasalǵan kelisimsharttar sheńberinde ınvestorlarǵa ınvestıtsııalyq joba qurylysynyń barlyq merziminde jáne obektini paıdalanýǵa engizilgennen keıin bir jyl boıy kvotasyz jáne ruqsatsyz sheteldik jumys kúshin tartý quqyǵy usynylady.
«Mundaı yntalandyrý sharalarynyń toptamasy negizinen 20 mıllıon dollardan kem bolmaıtyn ınvestıtsııalyq jobalar úshin qarastyrylady. Budan bólek, ınvestıtsııalyq ahýaldy jaqsartý úshin ınvestorlarǵa tabıǵı monopolııalar sýbektileriniń qyzmetine 5 jáne odan da uzaq jyldarǵa shekti tarıfter engizý qarastyrylady. Sonymen qatar, ınvestorlar múddelerin qorǵaýdy qamtamasyz etý úshin ınvestıtsııalyq ombýdsmen ınstıtýtyn engizý kózdeledi», - dedi Marat Qusaıynov.
Zań jobasy palatanyń jalpy otyrysyna shyǵarylatyn bolady.
