Investorlar kondıterlik salaǵa qarjy quıýǵa nege qulyqsyz

Qazaqstandaǵy 20 shaqty óndirýshilerdi biriktirgen Qazaqstan kondıterler qaýymdastyǵynyń ókilderi atalǵan salaǵa sheteldikter ınvestıtsııa salýǵa nege yntaly emestigin túsindirdi. Mamandardyń aıtýynsha, kondıterlik sala Qazaqstan ekonomıkasyna eleýli úles qosyp otyr.

Atalǵan salada jumys istep otyrǵan ár qyzmetker orta eseppen jylyna 44 myń AQSh dollarynyń ónimin óndiredi.  Al eldegi ortasha kórsetkish 10 myń dollar ekenin eskersek, onda kondıterlik jumysshynyń JІÓ-ge salatyn úlesi orta deńgeıden joǵary bolyp otyr.

Atalǵan salada 10 myń adam, oǵan salalas maı, qant, sút óndirisinde 20 myń adam eńbek etipotyrǵanyn eskersek, bul san el ekonomıkasyna áser etetini sózsiz.

Búginde Qazaqstannyń kondıterlik naryǵyna ınvestıtsııa salýshylar qatary sırek. Oǵan birneshe sebep bar. Eń aldymen ınvestorlar daıyn, aıaǵynan nyq turǵan bıznesti júrgizgileri keledi.

«Sheteldik ınvestorlar úshin myqty brendi qalyptasqan óndirister ǵana qyzyqty. Olar fabrıka salyp jańadan bastaýǵa nıetti emes. Kóbine qazaqstandyq kompanııalardyń ózderi barynsha ınvestıtsııa salyp jatyr. Іri oıynshylar ǵana. Usaq kásiporyndar munda kóp júre almaıdy. Usaq tsehter ashylyp jatyr. Biraq olar jergilikti naryqta kóbine bıskvıt ónimderin shyǵarady», - dedi qaýymdastyq prezıdenti Álıhan Talǵatbek.

Onyń aıtýynsha, kez-kelgen adam kondıterlik kásiporyn asha almaıdy. Óıtkeni tek qana óndiristiń bir jelisi 2 mln evro turady. Sondaı-aq oǵan qosymsha ǵımarat, adamdarǵa jalaqy berý kerek.

«Ol óndiristi tolyq júrgizýge 3-5 jyl ýaqyt ketedi. Sol sebepti Qaraǵandy kámpıtteri, Aqtóbe kompanııalarynyń óndiristeri toqtap tur. «Baıan-Sulý», «Rahat» fabrıkalary tolyq qýatynda jumys jasap turǵan joq», - dedi maman.

Otandyq kondıterlik óndirýshiler naryqta 60 paıyzǵa jumys jasap otyr. Óndiris qýatyn iske qosý úshin memleket tarapynan protektsıonıstik saıasat qajet deıdi mamandar.

Óıtkeni dúken sórelerin Reseı men Ýkraınanyń arzan táttileri jaýlap alǵan.