Investorlar kóbine qaı máseleler boıynsha shaǵymdanyp otyr
ASTANA. KAZINFORM – 2024 jyly Ákimshilik sotqa ınvestorlardan 200-deı talap aryz tústi. Bul týraly Senatta ınvestorlardyń zańdy múddelerin qorǵaý taqyrybyn talqylaý kezinde senator Nurlan Beknazarov málim etti.
- Elimizde ınvestorlardyń quqyqtary men múddelerin qorǵaý zańnamalyq deńgeıde qamtamasyz etilgen. Investorlar óz quqyqtary men múddelerin qorǵaý úshin Qazaqstan sottaryna, sondaı-aq halyqaralyq tórelik sottarǵa júginýge quqyly. Olar úshin salyq jeńildikteri, ınvestıtsııalyq sýbsıdııalar men kepildikter sekildi memlekettik qoldaýdyń birneshe túri qarastyrylǵan.
Elimizde ınvestorlardyń quqyqtaryn qorǵaý ınvestıtsııalyq qyzmettiń damýy úshin turaqty jáne qolaıly jaǵdaılar jasaýǵa, teń quqyqtardy qamtamasyz etý men ekonomıkalyq ósýin yntalandyrýǵa baǵyttalǵan. Degenmen bul salada belgili bir problemalar da joq emes. Aıta ketetin bolsaq, Joǵarǵy Soty Ákimshilik ister jónindegi sot alqasynyń málimeti boıynsha 2024 jyly Ákimshilik sotqa ınvestorlardan 200-deı talap aryz kelip tústi. Olardyń kóp bóligi salyq máselesi boıynsha Qarjy mınıstrligi men jer qoınaýyn ıgerý máselesi boıynsha Ónerkásip jáne qurylys mınıstrligine qatysty bolyp otyr, - dedi N. Beknazarov.
Onyń aıtýynsha, ınvestorlar basqa memlekettik organdar tarapynan qoldaý tappaı, máseleleri sheshilmegendikten, sotqa júginýge májbúr bolady. Іs júzinde mundaı ister jıi kezdesedi, biraq olar sotqa jetpeıdi. Mınıstrlikter olardy sotqa deıin sheshýge tyrysady. Joǵarǵy Sotta ınvestorlardyń paıdasyna isterdiń 80 paıyzy sheshiledi.
Depýtattyń paıymynsha, sheteldik ınvestorlardyń quqyqtaryn saqtaý Qazaqstannyń senimdi áriptes retindegi oń halyqaralyq ımıdjin qalyptastyrý úshin mańyzdy faktor sanalady. Birinshiden, zańnamanyń turaqtylyǵy, ásirese salyq salý jáne ınvestıtsııalardy retteý bóliginde qamtamasyz etilýi qajet. Bul rette, zańnama anyq jáne túsinikti bolýǵa tıis.
Zańnamalyq aktilerde eki túrli túsinistik pen qaıshylyqtarǵa jol bermeý, sondaı-aq olardyń jergilikti jerlerde durys iske asyrylýyn qamtamasyz etý qajet.
- Memlekettik organdar, laýazymdy adamdar qyzmetiniń ashyqtyǵyn qamtamasyz etý jáne olardyń jaýapkershiligin kúsheıtý máselesi nazardan tys qalmaıdy. Infraqurylymdy damytý máselesi mańyzdy másele bolyp qala beredi. Jalpy alǵanda, Qazaqstanda ınvestorlardyń quqyqtary men zańdy múddelerin qorǵaýdy jaqsartý zańnamany jetildirýdi, sybaılas jemqorlyqqa qarsy kúresti, qolaıly ınvestıtsııalyq ahýal qurýdy jáne daýlardy sheshýdiń balamaly tásilderin damytýdy qamtıtyn keshendi sharalardy talap etedi. Sheteldik kapıtaldy tabysty tartý úshin ınvestorlardy qoldaý men qorǵaýdyń tıimdi júıesin qurý qajet ekenin atap ótken jón, - dedi senator.
Eske salsaq, jaqynda Joǵarǵy sot tóraǵasy Aslambek Merǵalıev ınvestorlardy zań talaptaryn saqtap, parasattylyq tanytýǵa shaqyrdy.