Investorlar Qazaqstanda geologııalyq barlaýǵa qarjy salǵysy kelmeıdi
ASTANA. QazAqparat - Investorlar Qazaqstanda geologııalyq barlaýǵa qarjy salǵysy kelmeıdi. Bul týraly búgin Májiliste «Jer qoınaýy jáne jer qoınaýyn paıdalaný týraly» QR Kodeksi jobasyn tanystyrǵan QR Investıtsııalar jáne damý vıtse-mınıstri Tımýr Toqtabaev málim etti, dep habarlaıdy QazAqparat.
«Bizde eń paıdaly qazbalardyń 98 paıyzyn óndirý boıynsha kelisimshart jasalyp qoıǵan. Iá, olarda óndirý jaqsy júrip jatyr, salyq túsýde. Biraq bul qanshalyqty uzaqqa sozylady? ıAǵnı, bizge mıneraldy-shıkizattyq bazany tolyqtyrý qajet. Búkil álemde memlekettiń ózi mıneraldy-shıkizattyq bazany tolyqtyrmaıdy. Bul óte qymbatqa túsedi ári táýekeli de joǵary sala. Qazirgi ýaqytta ınvestorlar geologııalyq barlaý jasaýǵa asa yntaly emes», - dedi ol.
Máselen, onyń aıtýynsha, Investıtsııalar jáne damý mınıstrligi 100 ýchaskeni aýktsıonǵa shyǵaryp, bastapqyda tek 10-y ǵana óz ıelerin tapqan.
«Búgingi kúni 2017 jylǵy jaǵdaıǵa sáıkes jer qoınaýyn paıdalaný quqyǵyn berý boıynsha 10-nan astam konkýrs ótkizilip, qory bekitilgen barlyq derlik ken oryndary ózderimen kelisimshart jasaýshylardy tapty», - dedi vıtse-mınıstr.
Sondyqtan da Tımýr Toqtabaevtyń pikirinshe, jer qoınaýyn paıdalaný salasyndaǵy zańnamany yryqtandyrý qajettiligi týyndap otyr.
Buǵan deıin QR Investıtsııalar jáne damý vıtse-mınıstri Qazaqstanda barlaýǵa jumsalatyn ınvestıtsııa kólemi 1 sharshy metrge shaqqanda nebári 7 dollardy quraıtyndyǵyn, al bul kórsetkish Avstralııada 168, Kanadada 203 dollarǵa teń ekendigin aıtqan bolatyn .
«Qazaqstan 1 sharshy metrdi zertteýge arnalǵan shyǵyndar kólemi boıynsha kóshbasshy elderden 20 jáne odan da kóp ese artta qalyp otyr. Bizge shuǵyl arada dál osy geologııalyq barlaýǵa ınvestıtsııa tartý qajet. Jer qoınaýy salasyndaǵy zańnamany álemniń úzdik tájirıbesine sáıkestendirmeı bul maqsatqa qol jetkize almaımyz», - dedi ol.
