Investorlar elordada 11 jekemenshik mektep salady
NUR-SULTAN. QazAqparat – Elordada qala ákimi Altaı Kólginovtiń tóraǵalyǵymen ınvestıtsııa máseleleri boıynsha keńes ótti. Onyń barysynda bilim berý, densaýlyq saqtaý jáne development salasyndaǵy 13 perspektıvalyq joba tanystyryldy, dep habarlaıdy QazAqparat.
Ákimdikten málim etkendeı, jobalardy iske asyrý el ekonomıkasyna 27,6 mlrd teńge ınvestıtsııa tartýǵa, 1500-den astam jumys ornyn ashýǵa múmkindik beredi.
«Osylaısha, bilim berý salasyndaǵy 11 ınvestıtsııalyq joba jalpy alǵanda 10 myńnan astam oqý ornyn jáne balabaqshalarda 1 myńǵa jýyq oryn qurýǵa múmkindik beredi. »TAMOS EDUCATION« JShS jeke fızıka-matematıka mektebiniń qurylysy máselesin zertteıdi. Tartylatyn ınvestıtsııalardyń somasy 4 mlrd teńgeden asady. »Singapore International School Kazakhstan« JShS jobasyna sáıkes mektep qalashyǵyn salý kózdelip otyr. Sıngapýr ınvestorlary sheteldik bilim berý júıesin usynyp otyr. Jaz ýaqytynda semınar-dárister ótkizilip, tájirıbe almasý úshin sheteldik professorlar shaqyrylatyn bolady. Óz kezeginde »EURO AST KZ2019« JShS mektep pen balabaqsha salý máselesin qarastyrýda – mektep oqýshylary úshin 500 oryn jáne mektepke deıingi balalar úshin 120 oryn», - dedi vedomstvodan. Sonymen qatar, mektepter qurylysyna taǵy 8 kompanııa nıet bildirgen.
«Memleket basshysy ınvestıtsııa tartý boıynsha jumysty jandandyrýdy tapsyrdy. Biz júıeli negizde ártúrli elderdiń ınvestorlarymen kezdesemiz. Mysaly, búgin QR Saýd Arabııasynyń elshisimen, buǵan deıin Ulybrıtanııa, Túrkııa jáne taǵy basqa ınvestorlarmen kezdestik. Qazir mektepterde oryn tapshylyǵy 20 myńǵa jýyq. Qazir qalada úsh aýysymda oqıtyn 5 mektep bar. Eger mamyr aıynda mektepten 6 myń oqýshy shyqqan bolsa, jańa oqý jylynda birinshi synypqa 24 myń bala keledi dep kútilýde. Tek qana otandyq jáne sheteldik ınvestorlardy tarta otyryp, jeke menshik mektepterdiń qurylysy esebinen oqý oryndarynda 20 myńǵa jýyq oryndy qamtamasyz etýimiz kerek», - dedi A. Kólginov.
Qala ákimi mektep
qurylysyn tańdaǵan kezde sol ýchaskedegi halyqtyń tyǵyzdyǵyn, ınjenerlik jeliler
men ınfraqurylymǵa qosylý múmkindigin eskerý qajettigin atap ótti. Oqý
jylynyń sońynda qalada barlyǵy 108 mektep boldy. Budan basqa, keńeste
Tomoterapııa jáne ıadrolyq medıtsına aýrýhanalyq kesheni qurylysynyń jobasy da
qoldaý tapty. Sondaı-aq, áskerı qyzmetshilerge uzaq merzimge beriletin
apartamentterdi salý jobasy qaraldy.
