Investorlar daýyn elordanyń mamandandyrylǵan ekonomıkalyq soty qaraıtyn bolady
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Atalǵan zań jobasy, «Qazaqstan Respýblıkasynyń sot júıesi jáne sýdıalarynyń mártebesi týraly» Konstıtýtsııalyq zańǵa ózgerister men tolyqtyrýlar engizý týraly» Konstıtýtsııalyq zań jobasyna qoldanystaǵy zańnamany sáıkes keltirý maqsatynda Parlament depýtattarynyń zań shyǵarý bastamasymen ázirlendi.
«Zań jobasynyń basty maqsaty - ınvestorlar qatysatyn daýlardyń ınstantsııalaryn qaıta qaraý. Usynylyp otyrǵan ınvestıtsııalyq daýlardyń satylylyǵyn ózgertý máselesi Qazaqstan Respýblıkasynyń Prezıdenti janyndaǵy Qazaqstan Respýblıkasy quqyq qorǵaý jáne sot júıeleriniń reformasy boıynsha komıssııada qoldaý tapty. Osyǵan oraı zań jobasy Azamattyq protsestik kodeksine, Ákimshilik rásimdik-protsestik kodeksine jáne «Qazaqstan Respýblıkasynyń keıbir zańnamalyq aktilerine ákimshilik rásimdik-protsestik zańnama máseleleri boıynsha ózgerister men tolyqtyrýlar engizý týraly» 2020 jylǵy 29 maýsymdaǵy Zańǵa ózgerister men tolyqtyrýlardy kózdeıdi», - dedi Májilis depýtaty Qanat Mýsın.
Onyń aıtýynsha, birkelki júktemeni bólý jáne biryńǵaı praktıkany ázirleý maqsatynda atalǵan eki kodekse ınvestordyń qatysýymen daýlardyń ınstantsııalaryn qaıta qarastyrý boıynsha tıisti túzetýler engizilgen. Atap aıtatyn bolsaq, ınvestorlar qatysatyn daýlardyń qaralýyn Nur-Sultan qalasynyń mamandyrylǵan aýdanaralyq ekonomıkalyq sotqa beriledi.
«Atalǵan sot ınvestıtsııalyq daýlar boıynsha azamattyq isterdi, sondaı-aq ınvestordyń ınvestıtsııalyq qyzmetine baılanysty memlekettik organdardyń ınvestorlarǵa talap qoıýlaryn qaraıdy», - dedi depýtat.
Bul daýlardyń qatysýshalary:
1) Qazaqstan Respýblıkasynyń aýmaǵynda kásipkerlik qyzmetti júzege asyratyn sheteldik zańdy tulǵalar (olardyń fılıaldary, ókildikteri);
2) Qazaqstan Respýblıkasynyń zańnamasynda belgilengen tártippen sheteldiktiń qatysýymen qurylǵan, daýys beretin aktsııalarynyń (jarǵylyq kapıtalǵa qatysý úlesi) elý jáne odan kóp paıyzy sheteldik ınvestorǵa tıesili zańdy tulǵalar;
3) ınvestıtsııalardy júzege asyrýǵa memleketpen jasalǵan kelisimsharty bar ınvestorlar.
«Zań jobasynda mamandandyrylǵan sottardyń, tolyqqandy úsh satyly sot qorǵaý júıesiniń saqtalýyn jáne Joǵarǵy sottyń kassatsııalyq is júrgizýdi júzege asyrýyn eskere otyryp, ınvestorlardyń qatysýymen daýlardyń naqty satylylyǵyn aıqyndaý usynylady. Investorlardyń qatysýymen daýlardy qaraýdyń usynylǵan tásilin eskere otyryp, zań jobasyn qabyldaý elimizdiń ulttyq ınvestıtsııalyq klımatyna oń áser etetini belgili.
Sonymen qatar, osy jyldyń 1 shildesinen bastap jańa ákimshilik sottardyń qurylýyna jáne jumys isteýine baılanysty zań jobasymen Ákimshilik rásimdik-protsestik kodeksine naqtylaýshy sıpattaǵy túzetýler engiziledi», - dedi Qanat Mýsın.
Budan buryn habarlanǵandaı, búgingi Májilistiń jalpy otyrysynda «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq zań jobasy birinshi oqylymda maquldandy.
