Investorlar aıaqsyz qaldyrǵan Petropavldaǵy aýrýhana qurylysy bıýdjet esebinen jalǵasady
Petropavldaǵy aýqymdy joba – oblystyq kópsalaly aýrýhananyń qurylysyn túrik ınvestory júrgizip, bıyl jyl sońynda paıdalanýǵa berýi tıis edi. Jospar boıynsha medıtsına ortalyǵy álemdik standarttarǵa saı salynyp, óńirde medıtsına týrızmin damytýy tıis edi.
Alaıda kóktemde qurylys toqtap qaldy.
SQO ákiminiń orynbasary Sátjan Ablalıev aýrýhananyń bolashaǵy týraly qurylys salasyndaǵy ınvestjobalar boıynsha ótken onlaın týrda aıtty.
«Memlekettik-jekeshelik áriptestik mehanızmin júzege asyrý aıasynda, respýblıkalyq bıýdjet esebinen Petropavlda oblystyq kópsalaly aýrýhananyń qurylysy jalǵasady. Qazirgi ýaqytta memlekettik-jekeshelik áriptestik kelisimshartyna túzetýler engizilip jatyr», - dedi Sátjan Ablalıev.
Biraq qurylystyń qashan jandanatyny ázirge belgisiz.
Jalpy Petropavlda qazir 250 oryndyq eki emhananyń qurylysy júrip jatyr. «Jas Órken» jáne «Bereke» yqshamaýdandarynda salynyp jatqan nysandar keler jyly paıdalanýǵa berilýi tıis.
«Kelesi jyly Ýálıhanov aýdanynyń ortalyǵy Kishkenekólde de 250 orynǵa arnalǵan emhananyń qurylysy bastalady. Aıyrtaý aýdanynyń Lobanovo eldi mekeninde 30 adamdyq dárigerlik ambýlatorııa salynady. Budan basqa 4 dárigerlik ambýlatorııanyń, 2 feldsherlik-akýsherlik jáne bir medıtsınalyq pýnktiń jobalary ázir. Olardyń qurylysy 2023 jyly bastalady», - dedi oblys ákiminiń orynbasary.
Eske salaıyq, 2019 jyly túrik kompanııasy óz qarajatyna Petropavl qalasynda álemdik talaptarǵa saı kópsalaly aýrýhana qurylysyn bastaıtynyn jazǵan bolatynbyz.