Investordyń yǵyna jyǵylýdy azaıtý kerek – Asqar Jumadildaev

ASTANA. QazAqparat – Ulttyq ǵylym akademııasynyń jarǵysyna «akademııa qazaq tilin ǵylym tiline aınaldyrý maqsatynda jumys isteıdi» degen sózdi qosyp qoıý kerek.

Bul týraly Ǵylym jáne tehnologııalar jónindegi ulttyq keńestiń otyrysynda Ulttyq ǵylym akademııasynyń akademıgi Asqar Jumadildaev aıtty, dep habarlaıdy QazAqparat tilshisi.

«Táýelsizdiktiń 4 qyry bar. Olar – saıası táýelsizdik, ekonomıkalyq táýelsizdik, áskerı táýelsizdik jáne tehnologııalyq táýelsizdik. Ótken ǵasyrda memleketaralyq teke-tirester tórkini ıdeologııa salasynda jatty. Búgin teke-tires tehnologııa salasynda jatyr. Meni qazaqtyń tehnologııalyq táýelsizdigi mazalaıdy. Osy kúngi bizdiń óndiris oryndarynyń bári, ásirese jer qoınaýynan ken shyǵaratyn oryndardyń bári sheteldik ınvestorlarǵa berildi. Bul negizinen durys qadam boldy. Biraq, búginde zaman ózgerdi, memleket ózgerdi. Demek, biz osy ınvestorlarǵa talapty zaman talabyna saı berýimiz qajet. Investordyń yǵyna jyǵylýdy azaıtý kerek. Meniń oıymsha, olarǵa úsh shart qoıý kerek. Birinshi – salyq, ekinshi – ekologııa, úshinshi eń bastysy - jergilik mamandardy, jergilikti ǵylymdy óndiriske paıdalaný máselesi», - dedi ol.

Ǵalym jer qoınaýyn paıdalanýshylar tabysynyń 1 paıyzyn otandyq ǵylymdy damytýǵa jumsaý is-sharasy jalǵasa berýi tıistigin basa aıtty.

«Bul qarajatty tehnologııalyq táýelsizdikti qýattaıtyn jumystarǵa, ǵylym men qoǵam baılanysyn nyǵaıtatyn jumystarǵa, ǵylymı ınstıtýttarǵa jańa ǵımarat salýǵa jáne zamanaýı zerthana salýǵa, sonymen qatar ýnıversıtet oqýlyqtaryn qazaq tilinde shyǵarýǵa jumsaý kerek. Osy jumysty durys istetin bolsaq, jalpy ishki ónimniń keminde jarty paıyzyna jetýge bolady», - dedi ǵalym.

Asqar Jumadildaev Ulttyq ǵylym akademııasynyń jarǵysyna «akademııa qazaq tilin ǵylym tiline aınaldyrý maqsatynda jumys isteıdi» degen sózdi qosyp qoıý kerektigin basa aıtty.

«Qolynan kelse istesin, isteı almasa qoısyn. Biraq, ana jerde tursyn, mindeti ekenin bilsin», - dedi ol.