Investordyń quqyǵyn buzǵan 140 laýazymdy tulǵa jazalandy

ASTANA. Kazinform — Elimizde ınvestorlardyń quqyǵyn buzǵan 140 laýazymdy tulǵa jazalandy. Budan bylaı ınvestordyń quqyǵyn qorǵaý sharalary kúsheıtiledi. Bul týraly QR Bas prokýratýrasy Qoǵamdyq múddelerdi qorǵaý qyzmeti bastyǵynyń orynbasary Rızat Smaǵulov málimdedi.

— Aqmola oblysynda agroónerkásip salasyndaǵy iri ıspandyq ınvestor 3 jyl boıy jer ala almaı, naryqtan ketip qala jazdady. Qyzylorda oblysynda túrik ınvestory jylý energııasyn óndiretin aralas tsıkldi gaz zaýytyn salýdy bastady. Jalpy ınvestıtsııa kólemi 196 mlrd teńge. Ákimdik zaýyt qurylysyna qajetti jer telimin berý máselesin alty aı boıy sozbalanǵa salyp, nátıjesinde qajetti 8,5 ga kóleminen 2 ese az ýchaskeni usyndy. Mundaı jerge zaýyt salý múmkin emes. Bul ınvestıtsııalyq joba prokýrorlardyń súıemeldeýine alynyp, 1,5 aı ishinde ınvestorǵa qajetti aýdany bar jer telimi bólindi. Osy jyldyń qyrkúıek aıynda zaýyttyń tolyq iske qosylýy josparlanǵan, — dedi ol OKQ alańynda.

Onyń aıtýynsha, endigi jerde ınvestordyń quqyǵyn buzý faktisi boıynsha kinálilerdi jaýapqa tartý máselesi túbegeıli jolǵa qoıylady.

— Mysaly, Atyraýda ınvestorǵa jer ýchaskelerin berýden negizsiz bas tartqany úshin qala ákiminiń orynbasary jazalandy. Jalpy, prokýrorlar ınvestorlardy qorǵaý máselesine qatysty 220 qadaǵalaý aktisin engizip, memlekettik organdardyń 60 aktisiniń kúshin joıdy, 140 laýazymdy tulǵa jazalandy, — dep túıdi sózin Bas prokýratýra ókili.

Aıta keteıik, kúni keshe AQSh ınvestory qazaqstandyq ІT-startapqa $1 mln kóleminde ınvestıtsııa quıǵany týraly jazǵan edik.