Investordyń AEA ınfraqurylymyn salýǵa ketken shyǵynyn óteý tetigi engizilmek

ASTANA. KAZINFORM — Investordyń arnaıy ekonomıkalyq aımaq ınfraqurylymyn salýǵa ketken shyǵynyn óteý tetigi engizilmek. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.

— Memlekettik qoldaý sharalary aıasynda ınfraqurylym qurylysyn qarjylandyrýdyń qoldanystaǵy protsesi bıýdjet qarajatyn bólý jáne ınvestorlardyń ótinishterin maquldaý boıynsha uzaq rásimderdi qamtıdy. Bul rette bólinetin shekteýli bıýdjet qarajaty qajetti ınfraqurylymdy tartý quraly aýqymynda barlyq ótinish berýshi ınvestorlardyń ınfraqurylymǵa suranysyn tolyq qamtymaıdy. Sonymen qatar ınvestordyń ınfraqurylymdy óz betinshe salýy qomaqty kapıtal shyǵyndaryn talap etedi. Osyǵan baılanysty qosymsha salyq jeńildikterin berý jolymen ınvestordyń ınfraqurylym qurylysyna ketken shyǵystaryn óteý boıynsha qoldaýdyń jańa quralyn engizý usynylady, — dedi Úkimet basshysy.

Onyń málimetinshe, «Arnaıy ekonomıkalyq jáne ındýstrııalyq aımaqtardyń keıbir máseleleri týraly» Qazaqstan Respýblıkasy Úkimetiniń 2025 jylǵy 31 naýryzdaǵy № 194 qaýlysyn iske asyrý maqsatynda arnaıy ekonomıkalyq jáne ındýstrııalyq aımaqtar úshin ortaq paıdalaný ınfraqurylymyn salýǵa ınvestorlardyń shyǵystaryn korporatıvtik tabys salyǵyn esepten shyǵarý túrinde qosymsha salyqtyq jeńildikter berý arqyly óteý kózdeletin «Arnaıy ekonomıkalyq jáne ındýstrııalyq aımaqtar týraly» Zańǵa ózgerister ázirlengen.

— Atalǵan ózgerister Qazaqstan Respýblıkasy Parlamentiniń Májilisinde qaralyp jatqan «Qazaqstan Respýblıkasynyń keıbir zańnamalyq aktilerine joǵary tehnologııalyq aýmaqtardy damytý máseleleri boıynsha ózgerister men tolyqtyrýlar engizý týraly» zań jobasy aıasynda iske asyrylýda, — dedi Oljas Bektenov.

Buǵan deıin Oljas Bektenov Prezıdenttiń «Alataý» ITP» AEA aýmaǵyndaǵy joǵary tehnologııalyq óndiristerdi damytý jónindegi tapsyrmalarynyń oryndalý barysyn teksergenin jazǵan edik.