Investor Mańǵystaýdaǵy Dońǵa ken ornyn ıgerý kelisimin 2039 jylǵa deıin uzartty
Vedomstvo basshysy Maǵzum Myrzaǵalıev Úkimet otyrysynda osylaı dep málimdedi.
«Mańǵystaý oblysynyń áleýmettik-ekonomıkalyq damýynyń 2021 – 2025 jyldarǵa arnalǵan keshendi jospary boıynsha mınıstrlik birqatar is-sharalardy iske asyrady. Birinshiden, mınıstrlik «Total» kompanııasymen Dońǵa ken orny boıynsha ónimdi bólý týraly sharttyń merzimin 2024 jyldan 2039 jylǵa deıin uzartty. Esesine «Total» kompanııasy 2021-2025 jyldary shamamen 70 mlrd teńge ınvestıtsııa quıady. Nátıjesinde kompanııa munaı óndirý deńgeıin 25% arttyrýdy qamtamasyz etedi», - dedi mınıstr.
Onyń aıtýyna qaraǵanda, kelisimniń uzartylýy munaı óndirisiniń kólemin qazirgi jylyna 680 myń tonnadan 860 myń tonnaǵa deıin arttyryp, qurylys kezinde 400-ge jýyq jumys ornyn qurady.
«Ekinshiden, «QazMunaıGaz» kompanııasy Ózen, Jetibaı jáne Qalamqas ken oryndaryna irgeles ýchaskelerde qosymsha geologııalyq barlaý jumysyn júrgizedi. Osylaısha, Bekturly, Shyǵys jáne Ózen-Qaramandybas ýchaskelerinde 26 mlrd teńge somasyna geologııalyq barlaý jumysyn júrgizý josparlanǵan», - dedi Maǵzum Myrzaǵalıev.
