Investıtsııanyń eń joǵary ósimi 4 oblys pen elordada tirkeldi

ASTANA. KAZINFORM — 9 aıdaǵy jalpy ishki ónim ósiminiń 70 paıyzdan astamyn ónerkásip, saýda jáne kólik qyzmetteri qamtamasyz etti. Bul týraly Úkimet otyrysynda Ulttyq ekonomıka birinshi vıtse-mınıstri Azamat Ámrın aıtty.

- Bıyl 9 aıdyń qorytyndysy boıynsha ekonomıkanyń ósýi 6,3 paıyz boldy. Qańtar-tamyzben salystyrǵanda shamaly baıaýlaý baıqalady. Naqty sektordaǵy ósý 8,1 paıyz boldy, qyzmetter óndirisi 5,3 paıyzǵa ósti. Salalar arasynda kólik qyzmetteri, qurylys jáne taý-ken ónerkásibi eń joǵary ósýdi kórsetti. Saýda - 8,8, óńdeý ónerkásibi - 6,2, aýyl sharýashylyǵy 4,4 paıyzǵa ulǵaıdy. Jalpy ishki ónim ósiminiń 70 paıyzdan astamyn ónerkásip, saýda jáne kólik qyzmetteri qamtamasyz etti, - dedi ol.

Vıtse-mınıstrdiń aıtýynsha, ınvestıtsııalar ósýdiń faktory bolyp qalyp otyr. Negizgi kapıtalǵa salynǵan ınvestıtsııalar 13,5 paıyzǵa artyp, 13,8 trln teńge boldy. Onyń ishinde jeke ınvestıtsııalar 7,8 paıyzǵa ósti.

– Qarjy qyzmetine jalpy ınvestıtsııalar 2 esege, bilim berýge – 1,8 ese, óńdeý ónerkásibine – 30,7, aýyl sharýashylyǵyna – 21,1, kólik qyzmetterine 14,8 paıyzǵa ulǵaıǵan. Investıtsııalardyń eń joǵary ósýi Aqmola, Jambyl, Aqtóbe jáne Pavlodar oblystarynda, sondaı-aq Astana qalasynda baıqaldy. Investıtsııalardyń tómendeýi Atyraý oblysynda tirkeldi, - dedi Azamat Ámrın.

Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salynyp jatyr.