Investıtsııalyq jobalardy «jasyl dáliz» tetigine engizý krıterııleri qaraldy

ASTANA. KAZINFORM – QR Premer-Mınıstriniń birinshi orynbasary Roman Sklıardyń tóraǵalyǵymen Investıtsııa tartý jónindegi keńestiń kezekti otyrysy ótti.

Talqylaý sheńberinde ınvestıtsııalyq jobalardy «Jasyl dáliz» tetigine engizý krıterııleri qaraldy. Atalǵan krıterııler ashyqtyqty arttyrýǵa jáne ınvestorlardyń atqarýshy bılik organdarymen ózara is-qımylyn jeńildetýge baǵyttalǵan.

Jıyn barysynda Investıtsııalar týraly kelisimniń tetigin jaqsartýǵa erekshe nazar aýdaryldy. Usynylǵan tetik ótinimderdi qaraý ýaqytyn 12 aıdan 3 aıǵa deıin qysqartýǵa jáne rásimderdi jeńildetýge baǵyttalǵan, bul ınvestıtsııalar salasynda neǵurlym tıimdi jumys isteýge yqpal etedi.

Sonymen qatar avtojol qurylysy salasyna ınvestıtsııa tartý máselesi qaraldy. Jalpy, ınvestıtsııalyq masshtabta bekitilgen sharalar otandyq kompanııalardyń básekege qabilettiligin arttyrady jáne olardy iri avtojol jobalaryn iske asyrýǵa tartýǵa múmkindik beredi.

Sondaı-aq otyrysta qatty turmystyq qaldyqtardy energetıkalyq kádege jaratýdy odan ári damytý máselesi talqylandy. Bul sala ınvestıtsııa tartý úshin perspektıvaly salalardyń biri sanalady.

Otyrys sheńberinde farmatsevtıka jáne qatty turmystyq qaldyqtar salasyndaǵy jekelegen ınvestıtsııalyq jobalardyń problemalyq máseleleri kóterildi.

Óńirlik deńgeıde Qaraǵandy oblysy ákimdiginiń ınvestıtsııa tartý jónindegi qyzmeti qaraldy. Óńirde 12 myńnan astam jumys ornyn qura otyryp, 50 ınvestıtsııalyq jobadan turatyn pýl qalyptastyryldy.

Otyrys qorytyndysyna sáıkes, jaýapty memlekettik organdarǵa Investıtsııa tartý jónindegi keńestiń erekshe baqylaýynda bolatyn tapsyrmalar berildi.