Investıtsııalyq jobalardy pysyqtaýda memlekettik organdar sylbyr – Oljas Bektenov
ASTANA. KAZINFORM – Úkimet basshysy ekonomıkanyń naqty sektoryn qarjylandyrýdaǵy kedergilerdi atady.

— Ekonomıkanyń naqty sektoryn qarjylandyrý — serpindi ekonomıkalyq ósýdiń asa mańyzdy faktory. Óndiris, ınfraqurylym, agroónerkásip kesheni, kólik jáne energetıka salalaryna aýqymdy ınvestıtsııalar salynǵan jaǵdaıda ósimdi qamtamasyz etý múmkin bolmaq. Degenmen qazir sheshimin tappaǵan birqatar ózekti másele bar. Sonyń biri ınvestıtsııalyq jobalardy pysyqtaý kezinde memlekettik organdardyń qımyly — sylbyr, — dedi Oljas Bektenov Úkimet otyrysynda.
Premer-mınıstrdiń aıtýynsha, memlekettik organdardyń belsendi jumysy baıqalmaıdy.
— Biz uzaq kelisý rásimderi men bıýrokratııalyq kedergilerdiń kesirinen nemese vedomstvoaralyq ózara baılanystardyń joqtyǵynan bolashaǵy zor bastamalardyń baıaýlap qalǵanyn kórip júrmiz. Jaqynda men ınvestıtsııalyq ahýalǵa arnalǵan keńes ótkizdim. Kóp ýaqyt boıy sozylyp kelgen suraqtar sol arada birden sheshimin tapty. Barlyq memlekettik organ «bıýrokratııaǵa múlde jol joq» qaǵıdaty boıynsha jumys isteýge tıis, — deıdi Oljas Bektenov.
Aıta ketsek, bıyl Úkimet «Báıterek» holdınginiń kapıtalyn 1 trln teńgege ulǵaıtpaq.