Investıtsııalyq jobalar: Jańadan 188 myń jumys orny qurylady

ASTANA. KAZINFORM – Jańadan qurylǵan Ulttyq tsıfrlyq ınvestıtsııalyq platformaǵa 1160-tan astam joba júkteldi. Osy jobalar aıasynda shamamen 188 myń jumys ornyn qurý josparlanǵan. Bul týraly Investıtsııa komıteti tóraǵasynyń orynbasary Arman Aqsýbaev málimdedi.

— Ulttyq tsıfrlyq ınvestıtsııalyq platforma Memleket basshysynyń tapsyrmasy boıynsha ázirlenip, aqparattyq qaýipsizdikke senimdiligin rastap, 2024 jylǵy 17 jeltoqsanda paıdalanýǵa engizildi. Qazirgi ýaqytta Ulttyq tsıfrlyq ınvestıtsııalyq platformada 1160-tan astam ınvestıtsııalyq joba júktelgen. Olardyń jalpy somasy shamamen 49 trln teńge. Osy jobalar aıasynda shamamen 188 myń jumys ornyn qurý josparlanǵan, - dedi ol. 

Spıker bul jobalar «jalpyulttyq ınvestıtsııalyq jobalar pýlyn» qalyptastyratynyn atap ótti. 

— Jalpyulttyq ınvestıtsııalyq jobalar pýly aıasynda jyl sońyna deıin quny 5,5 trln teńge bolatyn 379 jobany iske qosý josparlanǵan. Búginde Platformaǵa kelesi qatysýshylar qol jetkize alady: jergilikti atqarýshy jáne memlekettik organdar, kvazımemlekettik uıymdar, Úkimet apparaty, Bas prokýratýra, «Atameken» UKP. Bul monıtorınginiń ashyqtyǵyn qamtamasyz etedi jáne memlekettik organdar qyzmeti keshigýiniń aldyn alýǵa baǵyttalǵan, - deıdi Arman Aqsýbaev.

Aıta keteıik, elimizde ınvestorlardy qoldaýdyń jańa tetikteri ázirlendi. Atap aıtqanda «Jasyl dáliz» júıesi men tsıfrlyq platforma iske qosyldy.