«Investıtsııalyq tapsyrys» jobalarynyń aldyn ala tizbesi jasaldy
ASTANA. KAZINFORM — QR Premer-mınıstriniń orynbasary — ulttyq ekonomıka mınıstri Serik Jumanǵarınniń tóraǵalyǵymen ekonomıkanyń basym baǵyttarynda ımportty almastyrýǵa, ishki óndiristi keńeıtýge jáne ınflıatsııalyq qysymdy tómendetýge baǵyttalǵan «Investıtsııaǵa tapsyrys berý» baǵdarlamasyn júzege asyrý boıynsha keńes ótti. Bul týraly Úkimet málim etti.
Baǵdarlama sheńberinde azyq-túlik sektorynda 12 basym baǵyt jáne azyq-túlik emes segmentte 4 baǵyt aıqyndaldy.
«Báıterek „UIH“ AQ basqarma tóraǵasynyń birinshi orynbasary Nurbolat Aıdapkelov habarlaǵandaı, 2026-2030 jyldarǵa arnalǵan ınvestıtsııalyq jobalardyń jıyntyq pýlyn qalyptastyrý sheńberinde holdıng ákimdiktermen, salalyq memlekettik organdarmen jáne enshiles qurylymdarmen birlesip bastamalardy biriktirý jáne ózektendirý boıynsha keshendi jumys júrgizdi.
Qorytyndysy boıynsha jalpy quny shamamen 85 trln teńgeni quraıtyn 1 501 jobanyń aldyn ala pýly quryldy, onyń ishinde agroónerkásip keshende 567 joba, óńdeý ónerkásibinde 464 joba jáne ınfraqurylymda 458 joba bar.
AÓK jobalaryna sút-taýarly fermalaryn salý, sút ónimderin qaıta óńdeý, et óńdeý kásiporyndary, usaq mal bordaqylaý alańdary, terini tereń óńdeý obektileri, jylyjaı keshenderi, jemis-kókónis ónimderin qaıta óńdeý, qant zaýyttaryn salý, dándi-burshaqty daqyldardy qaıta óńdeý, kókónis qoımalary jáne taǵy da basqa bastamalar jatady.
— Ónerkásipte toqyma klasterin qurý, turmystyq hımııa óndirisi, shıtti maqtany óńdeý boıynsha ıirý fabrıkalary men zaýyttaryn salý, sanıtarııalyq-gıgıenalyq quraldardy, qaǵaz buıymdaryn, aıaq kıimdi, karton jáne kompozıttik qaptamany, keramıkalyq plıtkalardy jáne basqa da qurylys materıaldaryn shyǵarý, sondaı-aq turmystyq tehnıkany óndirý boıynsha jobalar kózdelgen, — delingen habarlamada.
Osy bastamalardy júzege asyrýdyń qarjylyq irgetasyn damý ınstıtýttarynyń quraldaryn shoǵyrlandyrýdy jáne qarjylandyrýdy úılestirýdi qamtamasyz etetin «Báıterek „UIH“ AQ aıqyndaıdy.
Quny 7 mlrd teńgege deıingi jobalardy «Damý» qorynyń, Ónerkásipti damytý qorynyń jáne Agrarlyq nesıelik korporatsııanyń quraldaryn paıdalana otyryp, ekinshi deńgeıdegi bankterdiń qarjylandyrylýy usynylady. 7 mlrd teńgeden astam iri jobalardy Qazaqstannyń Damý Bankine, Qazaqstan Investment Corporation jáne ózge de damý ınstıtýttaryna qaraýǵa jiberý josparlanýda.
Keńes qorytyndysy boıynsha Serik Jumanǵarın «Báıterek „UIH“ AQ-ǵa Ónerkásip jáne qurylys, Aýyl sharýashylyǵy mınıstrligimen birlese otyryp, osy jyldyń naýryz aıyna deıin jobalarǵa baǵalaý júrgizýdi, olardyń baǵdarlamalyq basymdyqtarǵa sáıkestigin, daıyndyq deńgeıin, qarjylyq turaqtylyqty eskere otyryp, ári qaraı qarjylandyrý úshin tizbeni ońtaılandyrýdy tapsyrdy.