Investıtsııalyq shtab 45 mlrd dollar somasyndaǵy 90-nan astam jobany qarastyrdy – Oljas Bektenov

ASTANA. KAZINFORM – Úkimet iri bıznestiń aınalasynda shaǵyn jáne orta bıznes beldeýin damytýda eleýli áleýetti kórip otyr. Bul týraly elordadaǵy «Adal azamat. Adal eńbek. Adal bıznes» forýmynda Premer-mınıstr Oljas Bektenov málim etti.

«Memleket basshysynyń tapsyrmasy boıynsha ınvestıtsııalyq shtab bıznestiń quqyǵyn qorǵaý boıynsha ókilettigin keńeıtti. Bul rette máselelerdi jyldam sheshýge jáne ınvestıtsııalyq jobalardy iske asyrý tártibin jeńildetýge múmkindik jasaldy. Shtab qazirdiń ózinde shamamen 45 mlrd AQSh dollaryn quraıtyn 90-nan astam jobany qarap shyqty», - dedi O. Bektenov.

Úkimet basshysy bızneske artyq qysymnyń aldyn alýdyń taǵy bir quraly retinde prokýrorlyq fıltr tetigin atady.

«Endi kásipkerler memlekettik organdardyń kúmándi jáne qajetsiz shekteýlerinen qorǵalǵan. Árıne, bıyl «jasyl dáliz» tetigin engizý jumystyń oń nátıjesi boldy, ıaǵnı bes kúndik merzimde ınvestıtsııalyq jobalar boıynsha qajet memlekettik qyzmetterdi alýǵa múmkindik berdi», - dedi Premer-mınıstr.

Onyń sózine qaraǵanda, Úkimet iri bıznestiń aınalasynda shaǵyn jáne orta bıznes beldeýin damytýda eleýli áleýetti kórip otyr.

«Іri kásiporyndar jergilikti kompanııalarmen belsendi túrde uzaq merzimdi kelisimsharttar bekitýi kerek. Bul óz kezeginde memlekettik qoldaý alýdyń mindetti shartyna aınalady. Men bul tapsyrmany barlyq damý ınstıtýttaryna berdim. Іri kásiporyndarǵa ónim jetkizý tizbeginde jumys isteı otyryp, shaǵyn bıznes tabysty tájirıbeni úırenip, ózindegi sapa standartyn kóterýi qajet», - dedi Oljas Bektenov.

Budan buryn habarlanǵandaı, forým barysynda Premer-mınıstr elge janashyrlyq tanytqan kásipkerlerge alǵys aıtty.