Investıtsııalyq shtab 300-den astam jobanyń máselesin sheshti
ASTANA. KAZINFORM — Investorlarmen ózara is-qımyl tetikteriniń biri — QR Úkimeti janyndaǵy ınvestıtsııalyq shtab. Onyń jumysy jer ýchaskelerin berýden jáne ınfraqurylymǵa qosylýdan bastap ruqsat berý rásimderinen ótýge, shıkizatpen qamtamasyz etýge, qarjy kólemin qurylymdaýǵa jáne qurylys kezeńine shyǵýǵa deıingi jobalardy júzege asyrýdyń barlyq tsıklin qamtıdy.
Keıingi úsh jylda ınvestıtsııalyq shtabta 69 otyrys ótkizildi, onda jalpy quny $154 mlrd-tan astam 309 jobanyń ózekti máseleleri qaraldy. Shıkizatty tereń óńdeýge, lokalızatsııalaýǵa, qosylǵan quny joǵary ónim shyǵarýǵa, sondaı-aq turaqty jumys oryndaryn ashatyn jobalarǵa basymdyq beriledi.
41 ınvestıtsııalyq kelisim jasaldy jáne ınvestıtsııalar aǵyny 13 ese jedeldedi
Úkimet ákimshilik rásimderdiń merzimderin qysqartý jáne ınvestıtsııalar týraly kelisimderdi paıdalaný arqyly ınvestorlardy qoldaý tetikterin jetildirip jatyr.
2025 jyly Investshtabtyń sheshimderi 9 óńirdegi 12 joba boıynsha jalpy kólemi $1,5 mlrd-tan asatyn kapıtal salý arqyly qurylys-montajdaý jumystaryn jedeldetilgen tártippen bastaýǵa múmkindik berdi.
— Іri ınvestorlardy memlekettik qoldaýdyń negizgi tetikteriniń biri — ınvestıtsııalar týraly kelisimderdi qoldaný edáýir keńeıtildi. 2025 jyly $29,8 mlrd-qa 41 kelisim jasaldy, 2024 jyly $2,2 mlrd-qa 6 joba, 2026 jyldyń basynan beri shamamen $11 mlrd somasyna taǵy 25 kelisim jasaldy. Mundaı qoldaý ónerkásip, energetıka, kólik jáne densaýlyq saqtaý salalaryndaǵy jobalardy júzege asyrý sharttarynyń uzaqmerzimdi boljamdylyǵyn qamtamasyz etedi, — delingen Úkimettiń baspasóz qyzmeti taratqan habarlamada.
Mańyzdy jobalardyń qatarynda ınvestıtsııalary shamamen $1,5 mlrd bolatyn Balqashtaǵy Qazaq Smelter mys balqytý zaýytynyń qurylysy bar. Kásiporyn jylyna 300 myń tonna katodty mys shyǵarýǵa, 1,5 mln tonnaǵa deıin mys kontsentratyn óńdeýge jáne shamamen 1,6 myń jumys ornyn ashýǵa eseptelgen. Joba el ishinde mys shıkizatyn qaıta óńdeý kólemin ulǵaıtýǵa jáne qosylǵan quny joǵary ónim shyǵarýdy arttyrýǵa múmkindik beredi.
Mańǵystaý oblysynda Kazakhstan Guoyou Investment kompanııasy $287,6 mln ınvestıtsııa tarta otyryp, Quryq portynyń birinshi kezeginde kópfýnktsıonaldy termınal jobasyn júzege asyryp jatyr. Josparlanǵan qýattylyǵy 15 mln tonna bolady, 500-ge jýyq jumys orny ashylady. Termınal Transkaspıı halyqaralyq kólik marshrýtynyń ótkizý qabiletin arttyryp, Qazaqstannyń Kaspııdegi porttyq qýattaryn keńeıtedi jáne eldiń tranzıttik áleýetin nyǵaıtady.
Investıtsııalyq kelisimder munaı-gaz hımııasy, mashına jasaý jáne tamaq ónerkásibindegi jobalardy qoldaý úshin de qoldanylady.
Basym baǵyt — tereń óńdeý jáne qosylǵan quny joǵary ónim óndirý jobalary
Shıkizatty tereń óńdeý jáne qosylǵan quny joǵary ónim óndiretin jańa óndirister qurý jobalaryna basymdyq berilip otyr.
Atyraý oblysynda Advanced Processing kompanııasy jalpy quny shamamen $100 mln, jylyna 40 myń tonna ammıak pen 80 myń tonna ammonıı nıtratyn óndiretin zaýyt salý jobasyn júzege asyrylyp jatyr. Munaı-hımııa óndirisiniń janama ónimderin tereń óńdeý mıneraldy tyńaıtqyshtar ımportynyń ornyn basyp, eksport kólemin ulǵaıtýǵa múmkindik beredi. Jobany praktıkalyq júzege asyrý kezeńine shyǵarý úshin shıkizatpen qamtamasyz etý, ınfraqurylymǵa qosylý jáne «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵyna qatysýshy mártebesin alý máselelerin kelisý qajet boldy. Investıtsııalyq shtab naqty is-sharalardy, olardy júzege asyrý merzimderin jáne memlekettik organdardyń jaýapkershiligin belgiledi.
Túrkistan oblysynda «QazCoilPro» JShS jalpy quny shamamen 115 mlrd teńge (shamamen $256,8 mln) bolatyn tolyq óndiristik tsıkldi zaýyt salý jobasyn júzege asyryp jatyr. Kásiporyn metall balqytýdan bastap daıyn alıýmınıı taspasyn óndirýge deıingi barlyq óndiristik kezeńdi qamtıdy. Sonymen qatar alıýmınııdi odan ári óńdeýge baǵyttalǵan 6 óndiris jobasy pysyqtalyp jatyr. Onyń ishinde alıýmınıı qutylar, qurylys jáne avtomobıl ónerkásibine arnalǵan ónimder shyǵarý kózdelgen. Jobalardy júzege asyrý nátıjesinde 1 myńnan astam jumys orny ashylyp, óńirde alıýmınııdi tereń óńdeýdiń tolyq óndiristik tizbegin qalyptastyrýǵa múmkindik beredi.
Azyq-túlik ónerkásibi, mashına jasaý, munaı-gaz hımııasy, energetıka jáne kólik ınfraqurylymy salalarynda otandyq jáne sheteldik ınvestorlarǵa qoldaý kórsetý jalǵasyp jatyr. Olardyń qatarynda PepsiCo kompanııasynyń snek ónimderin óndirý jobasy, Carlsberg kompanııasynyń qyzmet aıasyn keńeıtý, sondaı-aq avtomobıl jasaý, aǵash óńdeý jáne qurylys materıaldaryn óndirý jobalary bar. Investıtsııalyq sheshim qabyldanǵannan keıin de ınvestorlarǵa qoldaý kórsetý jalǵasyp, qurylys-montaj jumystarynyń bastalýyna qajetti jaǵdaılar jasalady.
Jalpy, Investıtsııalyq shtabtyń negizgi maqsaty — ınvestıtsııa tartý jáne ınvestıtsııalyq jobalardy belgilengen merzimde júzege asyrý jónindegi jumystyń tıimdiligin arttyrý. Osy baǵytta ınvestıtsııalyq jobalardyń júzege asyrylýyn negizsiz sozýǵa jol bermeý maqsatynda jaýapty memlekettik organdardyń Investıtsııalyq shtab sheshimderin oryndaýyna baqylaý kúsheıtildi.
Eske salaıyq, munyń aldynda Astanaǵa 3 aıda 1,7 mlrd dollar shetel ınvestıtsııasy tartylǵanyn jazǵan edik.
