Investıtsııalyq saıasat tujyrymdamasy ózektilendiriledi — Nurlan Baıbazarov
ASTANA. KAZINFORM — Investıtsııalyq saıasattyń 2029 jylǵa deıingi tujyrymdamasy ózektilendirilip jatyr. Bul týraly búgin Úkimet otyrysynda Premer-Mınıstrdiń orynbasary — Ulttyq ekonomıka mınıstri Nurlan Baıbazarov aıtty.
«Búgingi tańda ázirlenip jatqan jańa Ulttyq damý josparyn eskere otyryp, Investıtsııalyq saıasattyń 2029 jylǵa deıingi tujyrymdamasyn ózektilendirý boıynsha jumys júrgizilýde. Eńbek ónimdiliginiń ósýine jáne eksporttyq sebettiń kúrdelenýine baǵdarlanǵan sapaly ınvestıtsııalardy keıinnen targetteý úshin ınvestıtsııalarǵa óńirlik jáne salalyq qajettilikter qalyptastyrylady. Halyqaralyq reıtıngterdi eskeretin ınvestıtsııalyq klımat boıynsha jańa KPI belgileý qaralýda. Jalpy ınvestıtsııalyq ahýaldy jaqsartý boıynsha halyqaralyq tájirıbe zerttelýde. Investıtsııalyq preferentsııalardy berý kezinde jobanyń kúrdeliligine jáne eksportqa baǵdarlanýyna baılanysty selektıvti tásil qoldanylatyn bolady», — dedi mınıstr.
Onyń aıtýynsha, ınvestıtsııalyq jobalardy keıinnen monıtorıngteý jáne berilgen preferentsııalardyń tıimdiligin baǵalaý boıynsha tásilder kózdeledi.
Ózektilendirilgen tujyrymdama Ulttyq damý jospary bekitilgennen keıin qabyldanady.
«Sonymen qatar mınıstrlik múddeli memlekettik organdarmen jáne bıznes-qoǵamdastyqpen birlesip, ınvestıtsııalardy yntalandyrýdyń tıimdiligin qamtamasyz etý úshin qoldanystaǵy qoldaý sharalaryn ózektilendirý boıynsha jumys júrgizýde. Salyq preferentsııalaryn berý, atap aıtqanda, qujatqa qol qoıylǵan sátten bastap korporatıvtik tabys salyǵynan bosatý osy quraldyń tartymdylyǵyna áser etetinin Investıtsııalar týraly kelisimder jasaý praktıkasyn taldaýdan kórýge bolady. Óıtkeni jeńildik kezeńiniń edáýir bóligi jobalaý jáne qurylys-montajdaý jumystarynyń kezeńderine sáıkes keledi. Osylaısha, korporatıvtik tabys salyǵynan 10 jyl bosatylǵannan keıin ınvestor is júzinde 7-8 jyl ishinde, ıaǵnı obekt paıdalanýǵa berilgennen keıin jeńildikter alady. Osyǵan baılanysty Investıtsııa týraly kelisim jasasý aıasynda jobany iske asyrýdyń naqty bastalýyna sáıkes korporatıvtik tabys salyǵynan bosatýdy qoldaný usynylady. Bul ınvestor úshin salyqtyq paıdalardy anaǵurlym ádil jáne teńgerimdi bólýdi qamtamasyz etedi», — dedi Nurlan Baıbazarov.
