Investıtsııalyq kompanııalar elimizde tyńaıtqysh óndirisin jolǵa qoımaq
ASTANA. KAZINFORM – Birqatar ınvestıtsııalyq kompanııa Qazaqstan aýmaǵynda tyńaıtqyshtar óndirýge baǵyttalǵan jobalardy iske asyrýǵa múddeli. Bul týraly Aýyl sharýashylyǵy mınıstrliginen málim etti.
- Importqa táýeldilikti tómendetý jańa óndiristerdi iske qosý, jumys istep turǵan kásiporyndardy jańǵyrtý jáne fermerler úshin de, tyńaıtqysh óndirýshiler úshin de yntalandyrý sharalaryn qamtamasyz etý josparlanýda. Máselen, 2024 jyly jumys istep turǵan zaýytty jańǵyrtý aıasynda «QazAzot» AQ ammonıı sýlfatyn óndirýdiń tolyq tsıklin iske qosty. Sonyń esebinen jylyna 40 myń tonna kóleminde tyńaıtqysh shyǵarylyp qamtamasyz etiledi. Sondaı-aq otandyq óndiristi damytý ári ishki naryqtyq tyńaıtqyshtardyń negizgi túrlerine degen qajettiligin jabý úshin Ónerkásip jáne qurylys mınıstrliginiń qoldaýymen mıneraldy tyńaıtqyshtar óndirýge baǵyttalǵan birqatar joba iske asyrylyp jatyr, - dedi mınıstrlikten agenttik saýalyna oraı.
Іske asyrylyp jatqan jobalardyń qatarynda Jambyl oblysynda keshendi tyńaıtqyshtar óndiretin «Evrohım-Qarataý» JShS-niń kásiporny bar. Onyń qýaty jylyna 1 mln tonnaǵa deıin jetedi. Al «QazAzot» AQ 2026 jylǵa qaraı ammıak-karbamıd keshenin salýdy josparlap otyr. Joba qýaty - 500 myń tonna selıtra jáne 578 myń tonna karbamıd.
- Búgingi tańda birqatar ınvestıtsııalyq kompanııa Qazaqstan aýmaǵynda osyndaı jobalardy iske asyrýǵa múddeli. Ótken jyldan bastap otandyq tyńaıtqyshtardy avanstyq sýbsıdııalaý tetigi tabysty iske asyryla bastady. Onda bıýdjettik sýbsıdııalar agrarshylarǵa arzandatylǵan tyńaıtqyshtardy satý úshin óndirýshilerdiń arnaıy shottaryna aldyn ala aýdarylady. Bul tásil jergilikti shıkizat negizinde mıneraldy tyńaıtqyshtar óndirisin damytýǵa keń múmkindikter ashady, - dedi vedomstvodan.
Buǵan deıin Jambyl oblysynda qoı júnine negizdelgen organıkalyq tyńaıtqysh eksperımenttik úlgide óndirilip jatqanyn jazǵan edik.