Investıtsııalyq kelisimsharttardy negizsiz buzǵany úshin 5 laýazymdy tulǵa jazalandy

ASTANA. KAZINFORM — Investıtsııalyq kelisimsharttardy negizsiz buzǵany úshin 5 laýazymdy tulǵa ákimshilik jaýapkershilikke tartyldy. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan. 

— «Prokýratýra týraly» Konstıtýtsııalyq zańǵa sáıkes, zańdylyqtyń buzylýyn, oǵan yqpal etken sebepter men jaǵdaılardy, sondaı-aq olardyń saldaryn anyqtaý jáne joıý prokýratýra organdarynyń mindeti. Ótken jyly Bas prokýratýra qoldanystaǵy ınvestıtsııalyq kelisimsharttardyń oryndalýyna taldaý júrgizip, onyń barysynda memlekettik organdar tarapynan zań buzýshylyqtar anyqtaldy. Atalǵan faktiler boıynsha 2025 jylǵy sáýirde Bas prokýratýra Syrtqy ister mınıstrligine zań buzýshylyqtardy joıý týraly tıisti usynym engizdi, — dedi Úkimet basshysy.

Onyń atap ótýinshe, atalǵan usynymdy qaraý nátıjesinde Investıtsııalar komıteti ınvestıtsııalyq kelisimsharttardy negizsiz buzý tájirıbesin toqtatty jáne jasalǵan ınvestıtsııalyq kelisimsharttar aıasynda ınvestıtsııalyq jobalardyń iske asyrylý barysyna baqylaýdy kúsheıtti.

— Zań buzýǵa jol bergeni úshin 5 laýazymdy tulǵa tártiptik jaýapkershilikke tartyldy. Sonymen qatar, Bas prokýratýra aktisi aıasynda Investıtsııalar komıteti ákimdiktermen birlesip, ınvestıtsııalyq kelisimsharttar aıasynda iske asyrylyp jatqan jobalardy Ulttyq tsıfrlyq ınvestıtsııalyq platformaǵa júkteý jumysyn júrgizip jatyr. Bul problemalyq máselelerdi jáne olardy iske asyrý merzimderin baqylaýǵa múmkindik beredi. Sondaı-aq ákimdiktermen kelisý satysynda jáne ınvestorǵa memlekettik jer ýchaskesin natýraldy grant túrinde berý kezinde ınjenerlik ınfraqurylymnyń bar-joǵy týraly naqty aqparatty mindetti túrde usyný tetigi pysyqtalyp jatyr, — dedi Oljas Bektenov.

Aıta keteıik, keshe Qazaqstan–Serbııa Іskerlik keńesiniń alǵashqy otyrysynda Serb ınvestorlaryna Qazaqstandaǵy basym salalar usynylǵan edi.