Investıtsııalyq daýlardyń 80% ınvestorlar paıdasyna sheshilgen – Prezıdent
ASTANA. KAZINFORM – Bılik jáne bıznes ókilderi ózekti túıtkilderdi ashyq talqylap, sheshý joldaryn birlese otyryp izdeýi qajet. Bul týraly Prezıdent Qasym-Jomart Toqaev elordada «Ákimshilik ádilet jáne onyń quqyq ústemdigin qamtamasyz etýdegi róli» atty halyqaralyq forýmda aıtty.
Prezıdent elimizde sot júıesi men quqyq qorǵaý salasyndaǵy túbegeıli reformalarmen qatar aýqymdy ekonomıkalyq ózgerister júrip jatqanyn aıtty.
– Munyń memleketimiz úshin mańyzy aıryqsha. Іskerlik belsendilikti arttyrý maqsatynda, sonyń ishinde ınvestıtsııalyq daýlardy sheshý úshin qolaıly quqyqtyq ınstıtýtsıonaldyq orta qalyptasýda. Sonyń arqasynda sot sheshimderiniń 80 paıyzyna jýyǵy ınvestorlardyń paıdasyna shyǵarylyp jatyr, – dedi Memleket basshysy.
Q. Toqaev otandyq jáne sheteldik ınvestorlarmen kezdesýlerde bılik pen bıznes ókilderi ózara syndarly baılanys ornatýy keregine, ózekti túıtkilderdi ashyq talqylap, sheshý joldaryn birlese izdeýine nazar aýdaratynyn aıtty.
– Bılikte otyrǵan laýazymdy tulǵalarǵa tapsyrmam: ár daýly jaǵdaıda mámilege keletin joldy izdeý kerek, biraq bul jol zańnama júıesine nuqsan keltirmeýi qajet. Basqa sózben aıtqanda, ár kelisimniń zańdyq shekteýi bolýǵa tıis, – dedi Prezıdent.
Aıta keteıik, kassatsııalyq sottardy qurý bastamasy dál osyndaı jıynnyń birinde kóterilgen bolatyn.
