Investıtsııaǵa tapsyrys: Qazaqstan bıznesi men agrosektory úshin jańa múmkindikter ashylady

ASTANA. KAZINFORM — Qazaqstan ekonomıkanyń naqty sektoryn damytýǵa baǵyttalǵan «Investıtsııaǵa tapsyrys» aýqymdy memlekettik baǵdarlamany iske qosty, dep habarlaıdy Úkimettiń baspasóz qyzmeti.

Baǵdarlamanyń basty maqsaty – ishki naryqta suranysy joǵary, ımporttyń úlesi kóp taýarlardy óndirýge baǵyttalǵan shaǵyn, orta jáne iri bıznes jobalarǵa qoldaý kórsetý

Baǵdarlama aıasynda, ásirese, agroónerkásip keshenine jáne óńdeýshi ónerkásiptegi keń tutynatyn taýarlarǵa aıryqsha kóńil bólinbek.

Aýyl sharýashylyǵy mınıstri Aıdarbek Saparovtyń aıtýynsha, atalǵan baǵdarlama elimizde asa joǵary suranysqa ıe baǵyttarǵa ınvestıtsııa tartýǵa jol ashyp, ımportty almastyrý men ekonomıkany ártaraptandyrýdyń júıeli quralyna aınalady.

— Shyndyǵynda jańa qadam negizgi ónimder boıynsha ishki tapshylyqty joıýmen qatar, eksportqa baǵyttalǵan óndiristerdi qalyptastyrýǵa múmkindik beretini sózsiz. Bul óńirlerdiń turaqty ekonomıkalyq ósýin qamtamasyz etedi, — dedi mınıstr.

Memleket ımportty almastyrý jáne eksporttyq áleýeti joǵary salalardy anyqtaıdy, al óńirler naqty jobalar jasap, olardy júzege asyrýǵa daıyn bıznes-bastamalardy qalyptastyrady. Jobalardyń tıimdiligi, qarjylyq jáne óndiristik múmkindikteri «Báıterek» holdıngi arqyly ábden pysyqtalady, bul ashyqtyqty qamtamasyz etip, ınvestıtsııalyq táýekelderdi azaıtýǵa jol ashady.

Aýyl sharýashylyǵy mınıstrligi aımaqtardyń sút, et, kókónis, qant, kartop, balyq jáne basqa negizgi ónimder boıynsha qamtylýyn baǵalaýdy, tapshylyqtardy jáne ımportqa táýeldilik deńgeıin anyqtaýdy, óńdeýshi kásiporyndardyń júktemesin taldaýdy, aımaqtardyń shıkizattyq áleýetin baǵalaýdy, sondaı-aq kólemin tez arttyrýǵa múmkindik beretin ónimderdiń eksporttyq áleýetin saralaıtyn keshendi taldaý júrgizdi.

Mınıstrlik derekter negizinde ákimdikterge naqty salalardy jáne anyqtalǵan tapshylyqtardyń ornyn toltyrý úshin ınvestorlar tabýdy usyndy.

Agroónerkásip keshenine qatysty jobalar tizimi: sút ónimderin óndiretin fermalar salý, et jáne qus sharýashylyǵyn damytý, sút, et, teri men jún jáne balyq óńdeý, astyqty tereń óńdeý, jylyjaı keshenderin qurý jáne qant ónerkásibin damytý.

Atalǵan baǵyttar ımportqa táýeldilikti tómendetý jónindegi memlekettik strategııaǵa sáıkes keledi jáne ár aımaqtyń resýrstyq bazasyn eskere otyryp naqty jobalardy iske asyrýǵa baǵyttalǵan.

Qazirgi ýaqytta óńir ákimdikteri, Astana, Almaty jáne Shymkent qalalary bıznes-qoǵamdastyq pen «NUH «Báıterek» AQ-men birlese otyryp, ınvestıtsııalyq jobalar tizimin skrınıngten ótkizýde. Bul kezeńde keıbir jobalar tıisti talaptarǵa sáıkes kelmegendikten irikteýden ótkizildi. Olar: shıkizattyq baza jetkiliksizdigi, ekonomıkalyq turaqsyzdyq, rastalǵan ınvestordyń bolmaýy, tehnologııalyq talaptarǵa sáıkessizdik nemese burynnan júktelgen qýattylyqtyń qaıtalanýy.

Іrikteýdiń nátıjesinde túpkilikti tapshylyqtardy naqty jabýǵa jáne ımportqa táýeldilikti tómendetýge baǵyttalǵan sapaly, teńdestirilgen joba portfeli qalyptasady.

Sút óńdeý Aqmola, Aqtóbe, Almaty, Pavlodar oblystarynda jáne Shymkent qalasynda damıtyn bolady. Jospar boıynsha 310 myń tonna daıyn ónim shyǵaratyn 10 joba júzege asyrylyp, jalpy somasy 67,6 mlrd teńge ınvestıtsııa tartylmaq.

Eń iri ınvestor — SolicoGroup kompanııasy (Iran) Almaty oblysynda jylyna 200 myń tonna irimshik óndiretin zaýyt salýdy josparlap otyr, ınvestıtsııa kólemi 33,1 mlrd teńge.

Qus etimen qamtamasyz etý 80%-dy quraıdy.

Sonyń aıasynda Almaty, Túrkistan, Aqmola, Soltústik Qazaqstan oblystary, Jetisý óńiri jáne Astana qalasynda 456,7 myń tonnadan astam daıyn ónim shyǵaratyn 23 joba júzege asyrylyp, jalpy ınvestıtsııa kólemi 432,2 mlrd teńgege jetetin bolady.

Іri jobalardyń qatarynda ınvestıtsııa kólemi 146 mlrd teńge, jyldyq ónim 120 myń tonnadan asatyn «Aıtas KZ» qus fabrıkasy bar.

Qant boıynsha ımportqa táýeldilikti tómendetý maqsatynda Qazaqstanda Almaty, Jambyl jáne Soltústik Qazaqstan oblystarynda birqatar jobalar iske asyrylmaq. Almaty oblysynda 247,1 ınvestıtsııa tartylatyn, jyldyq qýaty 500 myń tonnaǵa eseptelgen QAZAQARABSUGAR jobasy qolǵa alynbaq.

2025 jyly Qazaqstan 27 mln tonna astyq jınap, rekordtyq kórsetkishke qol jetkizdi, bul joǵary qosymsha qundy ónim shyǵarý múmkindikterine jol ashady.

Qytaılyq «Dalıan Holdıng» kompanııasy Aqmola oblysynda 3 mln tonna astyq óńdeýdi josparlap otyr, ınvestıtsııa kólemi $1,6 mlrd.

— Árbir joba erekshe baqylaýda. Olardyń tabysty júzege asýyna Mınıstrlik jan-jaqty qoldaý kórsetedi. Biz aımaqtarmen jáne bıznes salasymeg jumysty kúsheıtýdi úzdiksiz jalǵastyramyz, árbir jobanyń qarjylyq turaqtylyǵy, tehnologııalyq negizdiligi jáne el ekonomıkasy úshin barynsha tıimdiligi qamtamasyz etilýi tıis, — dep atap ótti mınıstr.

Osyǵan deıin Qazaqstanda ınvestıtsııa tartýdyń jańa tetigi iske qosylatyny habarlandy.