Investıtsııa, óndiris, tsıfrlandyrý: Qazaqstan ekonomıkasy jańa baǵytqa bet aldy
ASTANA. KAZINFORM — Ónerkásip, ınfraqurylymmen qatar Qazaqstan tsıfrlyq ortany jáne kadrlardy daıarlaý júıesin damytyp jatyr. Bul baǵyttar tehnologııalyq óndiristerdi, qyzmet kórsetý ortalyqtaryn jáne bilikti mamandardy qajet etetin basqa jobalardy ornalastyrýǵa múddeli halyqaralyq kompanııalar úshin mańyzdy bola tústi, dep jazady The World Financial Review.
Elimizde memlekettik qyzmetterdiń 90%-dan astamy elektrondy túrde usynylady. Elektrondyq qyzmet túrleriniń sany 2021 jyly 657-den 2026 jyly 1 333-ke deıin ósti. Halyqtyń 97,5%-y ınternetke qol jetkizgen.
Tsıfrlyq memlekettik qyzmetterdiń keńeıýi bıznestiń memlekettik organdarmen ózara is-qımylyn jeńildetýge negiz qalyptastyrady. Óz kezeginde ınternetke qoljetimdiliktiń joǵary deńgeıi elektrondyq kommertsııany, fıntehti jáne tsıfrlyq servısterdi damytýǵa múmkindik beredi.
Budan bólek, aýmaǵy keń jáne halyq tyǵyzdyǵy salystyrmaly túrde tómen el úshin memlekettik qyzmetterdi onlaın formatqa kóshirýdiń tehnologııalyq qana emes, ekonomıkalyq mańyzy da bar. Tsıfrlandyrý azamattar, bıznes jáne memleket arasyndaǵy qashyqtyqty qysqartyp, qyzmetterge qoljetimdilik qunyn tómendetedi.
Qazaqstannyń tsıfrlandyrý salasyndaǵy serpilisi basqa elder úshin jaqsy úlgige aınaldy: Dúnıejúzilik zııatkerlik menshik uıymy (DZMU) Global Innovation Index 2025 reıtınginde «Úkimettiń onlaın-qyzmetteri» kórsetkishi boıynsha Qazaqstandy álemde 10-orynǵa qoıdy. DZMU tsıfrlyq memlekettik qyzmetterdi eldiń ınnovatsııalyq damýyndaǵy eń myqty kórsetkishterdiń biri retinde baǵalaıdy.
Ekonomıkany jańǵyrtý adamı kapıtaldy sapaly túrde jańartýdy da qajet etedi. Qazaqstannyń damýynyń jańa strategııasynda bul faktor eskerilip, basym baǵyttardyń birine aınaldy. El bilim berý men ǵylymı zertteýlerge salynatyn ınvestıtsııa kólemin arttyryp keledi. Ǵylymı-zertteý jáne tájirıbelik-konstrýktorlyq jumystarǵa (ǴZTKJ) ishki shyǵyndar 2019 jylǵy 42,3 mlrd teńgeden 2025 jyly 252,5 mlrd teńgege deıin ósti.
Joǵary bilim berý salasyndaǵy halyqaralyq yntymaqtastyq damýda: elde sheteldik ýnıversıtetterdiń 32 fılıaly jumys isteıdi jáne sheteldik joǵary oqý oryndarymen strategııalyq áriptestiktiń basqa da nysandary júzege asyrylyp jatyr. Uzaqmerzimdi perspektıvada bul ekonomıkanyń neǵurlym tehnologııalyq jáne ǵylymdy qajet etetin sektorlaryna ınvestıtsııalar tartý úshin negiz qalyptastyrady.
