Investıtsııa kólemin arttyrý úshin qandaı jumystar atqarylyp jatyr
ASTANA.KAZINFORM – QR Parlamenti Palatalarynyń birlesken otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın ınvestıtsııa tartýdy kúsheıtýge arnalǵan baǵdarlamalar jóninde málimdeme jasady.
QR Úkimetiniń jáne QR Joǵary aýdıtorlyq palatasynyń 2025 jylǵy respýblıkalyq bıýdjettiń atqarylýy týraly esepterin bekitý jónindegi otyrysta oǵan Senat depýtaty Bekbolat Orynbekov depýtattyq saýal joldady.
– Ótken jyly syrttan kelgen ınvestıtsııanyń jalpy kólemi 14,4%-ǵa ósip, 20,5 mlrd dollar boldy. Biraq aqsha aǵyny azaıyp, 900 mln dollar tómen kórsetkishti kórsetti. Sonymen birge, ınvestorlar tapqan paıdasyn qaıta bızneske salýy da kemip, 1,5 mlrd dollarǵa azaıdy. Tikeleı sheteldik ınvestıtsııalar kóp túskenimen, sheteldikter bizdiń óndiriske saqtyqpen qarap, paıdasyn syrtqa alyp ketýdi jón kóredi. Qazirgi ınvestıtsııa tartýmodeli men quraldarynda qandaı ózgerister men tolyqtyrýlar josparlanyp otyr? Іshki naryqtyń shaǵyndyǵyn eskersek, shıkizattyq emes joǵary tehnologııa eksportyn damytýǵa qandaı sharalar qabyldanyp jatyr? – dep surady senator.
Serik Jumanǵarın qazirgi qoldanystaǵy ınvestıtsııalyq model alǵa qoıǵan mindetterge sáıkes keletinin atap ótti.
– Sonymen qatar 2025 jyldyń sońynda 2030 jylǵa deıingi ınvestıtsııalyq tujyrymdama jańartyldy. Eger buryn memleket búkil qajetti jaǵdaıdy jasap, ınvestorlardyń sheshimin kútse, qazirgi ýaqytta biz perspektıvalyq baǵyttardy taldap, aıqyndap, sapaly jobalardy daıyndap, tehnologııalyq áriptesterdi tartýymyz kerek. Olardy óndiris iske qosylǵannan keıin, búkil jumys baǵytynda súıemeldeýimiz qajet. Osy jańa tásil proaktıvtik ekonomıkalyq saıasat dep ataldy. Onyń úsh komponenti bar qazirgi ýaqytta. Birinshi komponent – naryqty taldaý jáne osy jumysty egjeı-tegjeıli júrgizý úshin biz «Báıterek» holdınginiń ishinde Investment Board degen qyzmet ashtyq. Onyń ishinde tórt dırektsııa bar (metallýrgııa, taý-ken kesheni, agroónerkásip, qurylys, kólik, týrızm, tsıfr salalary qamtylǵan). Ár on salanyń ishinde qajetti strategııalardy daıyndadyq. Ekonomıkalyq zertteý ınstıtýty, sondaı-aq, Ulttyq ekonomıka mınıstrligindegi Ekonomıka salalaryn damytý jáne ınvestıtsııalyq jobalar monıtorıngi departamenti qosymsha jumys isteıdi, – dedi ol.
Al ekinshi komponent – álemdegi jetekshi kompanııalardy tartý jáne ozyq tehnologııalardy izdeý. Bul klassıkalyq ınvestıtsııa quıý qaǵıdaty boıynsha júrgiziledi.
– Úshinshi komponent – kredıttik jetkiliktilikti arttyrý jáne kapıtaldy jumyldyrý. Qazirgi ýaqytta bıznestiń kepildikteri nesıe alýǵa jetkilikti emes. Sol sebepti biz eki kepildik qoryn qurdyq. Birinshi qor «Báıterek» holdıngi 7 mlrd teńgege, 85%-ǵa deıin, al ekinshi qor 7 mlrd astam kepildik beredi, – dedi Serik Jumanǵarın.
Sonymen qatar ınvestıtsııalyq jobalardy qarjylandyrýǵa ekinshi deńgeıli bankterdiń qatysýyn keńeıtýge nazar aýdarylyp otyr.
Aıta keteıik, buǵan deıin Qazaqstannyń agrarlyq sektoryna 100 mln dollar ınvestıtsııa tartylǵanyn jazǵanbyz.
