Investıtsııalyq tarıfter boıynsha qyzmet kórsetetin sýbektiler sany eki esege artty - TMRA
ASTANA. Qyrkúıektiń 27-si. QazAqparat /Qanat Mámetqazyuly/ - Aǵymdaǵy jylǵy kórsetkishter boıynsha elimizde ınvestıtsııalyq tarıfter boıynsha qyzmet kórsetetin sýbektiler sany eki esege artty. Búgin QR Parlamenti Májilisinde «Tarıftik saıasattaǵy energııany únemdeý» taqyrybynda ótken Úkimet saǵatynda bul týraly Tabıǵı monopolııalardy retteý agenttiginiń tóraǵasy Nurlan Aldabergenov málim etti.
«Ekonomıkanyń monopolııalyq sektoryn memlekettik retteý júıesin damytý, energııany únemdeý, energııa resýrstaryn, onyń ishinde elektr energııasyn jáne sýdy únemdeý máseleleri agenttik jumysynyń strategııalyq baǵyty bolyp tabylady. Búgingi kúni agenttik 1 myń 632 retteletin qyzmetterdi kórsetetin 1 myń 80 tabıǵı monopolııalar sýbektileriniń qyzmetin retteýdi júzege asyrady. Onyń ishinde sý kárizi júıesi salasynda - 867, elektr energııasy salasynda 469, munaı men gaz tasymaly salasynda - 52, kólik salasynda - 244 sýbektiler qamtylyp otyr. Budan basqa, 400 domınanttar men 15 memlekettik monopolııalar sýbektilerdiń qyzmeti de agenttik arqyly retteledi», dedi agenttik tóraǵasy.
Onyń aıtýynsha, retteletin sektorlardyń ınvestıtsııalyq tartymdylyǵyn arttyrýǵa baǵyttalǵan jumystardyń nátıjesinde salada birshama alǵa jyljýshylyqtar oryn alǵan. «Máselen, aǵymdaǵy jylǵy 9 aıdyń ishindegi ınvestıtsııalyq tarıfter boıynsha qyzmet kórsetiletin sýbektiler sany ótken jylmen salystyrǵanda eki esege artyp, 27 tabıǵı monopolııalar sýbektisin quraǵan. Osylaısha, tutynýshylar úshin tarıfter turaqtylyǵy aktıvterdi jańǵyrtý, ınvestıtsııa salý esebinen qyzmetterdiń sapasyn kóterý esebinen qamtamasyz etilip otyr», dedi N. Aldabergenov.
