Investıtsııalyq shtabta jańartylatyn energııa kózderi jobalaryn iske asyrý barysy qaraldy
Bul týraly QazAqparat Úkimettiń baspasóz qyzmetine silteme jasap habarlaıdy.
Energetıka mınıstri Maǵzum Myrzaǵalıev pen «Samuryq-Qazyna» UÁQ» AQ basqarma tóraǵasy Almasadam Sátqalıev QR jańartylatyn energetıka salasyndaǵy ınvestıtsııalyq jobalardyń mártebesi týraly baıandady.
Máselen, 2014 jyldan bastap 780 mlrd teńge, onyń ishinde 150 mlrd teńge osy jyldyń 9 aıynda tartyldy. 1975 MVt kóleminde energııa generatsııasynyń jıyntyq qýaty bar 126 JEK nysany paıdalanýǵa berildi, 2 myńnan astam turaqty jumys orny quryldy. JEK-ten alynatyn elektr energııasynyń 41%-y kún elektr stantsııalarynda, 35%-y jel elektr stantsııalarynda, 23,8%-y shaǵyn sý elektr stantsııalarynda óndiriledi.
2030 jylǵa qaraı elektr energııasyn generatsııalaý qurylymyndaǵy JEK úlesin qolda bar 3%-dan 15%-ǵa deıin arttyrý josparlanyp otyr. Bul kórsetkishke qol jetkizý úshin JEK-tiń 7 GVt jańa qýattaryn iske qosý qajet, bul salaǵa 3 trln teńge kóleminde ınvestıtsııa tartýǵa múmkindik beredi. Qazirgi tańda Qazaqstan Úkimeti «ADQ» arab kompanııasymen jáne «Total Energies» frantsýz kompanııasymen ýaǵdalastyqqa qol jetkizdi.
Іri aýqymdy jobalar aldaǵy 10 jylda 5 GVt jańa JEK qýatyn kezeń-kezeńimen engizýdi kózdeıdi. Birlesken ınvestıtsııalyq jobalardy iske asyrý atmosferaǵa parnıktik gazdar shyǵaryndylarynyń kólemin 8 mln tonnaǵa azaıtýǵa, qosymsha 20 mlrd kVts jasyl energııa óndirýge jáne 3 myń jumys ornyn qurýǵa múmkindik beredi. Investorlar úshin qolaıly jaǵdaı týdyrý maqsatynda Qarjy-esep aıyrysý ortalyǵynyń bazasynda «Bir tereze» qaǵıdatyn engizý, JEK paıdalanatyn energııa óndirýshi uıym men tutynýshylar arasynda ekijaqty kelisimsharttar jasasý máselesin retteý, sondaı-aq ınvestorlardyń múddesin qorǵaý maqsatynda tórelik kelisimdi resimdeý rásimin ońaılatý usynylady.
Densaýlyq saqtaý mınıstri Alekseı Tsoı densaýlyq saqtaý ınfraqurylymyn damytý boıynsha ınvestıtsııalyq jobalar týraly baıandady. Tórt jyl ishinde Qazaqstanda 20 kópsalaly aýrýhana men 2 ǵylymı-ınnovatsııalyq kópsalaly klınıka salý josparlanǵan. Investor kompanııalardyń, óńirler ákimdikteriniń jáne ortalyq memlekettik organdardyń ókilderi Túrkistan, Petropavl, Nur-Sultan, Qostanaı, Aqtaý, Aqtóbe, Atyraý, Qaraǵandy, Kókshetaý, Pavlodar, Taraz, Almaty jáne t. b. qalalarda gospıtaldar salý jobalarynyń iske asyrylý barysy týraly baıandady.
Úkimet basshysy jańartylatyn energetıka jáne densaýlyq saqtaý salasynda josparlanǵan jobalardy ýaqytyly jáne sapaly iske asyrýdy qamtamasyz etýdi tapsyrdy. Barlyq memlekettik organdarǵa, óńirlerdiń ákimdikterine jáne kvazımemlekettik sektor sýbektilerine ishki jáne syrtqy ınvestıtsııalardy tartý jumysyn júıeli negizde jalǵastyrý týraly tapsyrma berildi.
