Investıtsııalyq ombýdsmen ınstıtýtynyń quzyreti keńeıedi

ASTANA. QazAqparat – Qazaqstanda jumys isteıtin sheteldik ınvestorlardyń quqyqtary men zańdy múddelerin qorǵaıtyn Investıtsııalyq ombýdsmen ınstıtýty kúsheıtilmek. Bul týraly Syrtqy ister mınıstrligi ashyq talqyǵa shyǵarǵan Úkimet qaýlysynda jazylǵan, dep habarlaıdy QazAqparat tilshisi.

Atap aıtqanda, endi ınvestıtsııa jónindegi ýákiletti organnyń birinshi basshysy nemese onyń mindetin atqaratyn tulǵa - ınvestıtsııalyq ombýdsmenniń orynbasary laýazymy engizilmek.

«Qalyptasqan praktıka osy ınstıtýttyń turaqty jumysyn talap etedi. Osyǵan baılanysty ınvestıtsııalyq ombýdsmen janyndaǵy jumys tobyn basqaratyn ınvestıtsııalyq ombýdsmenniń turaqty orynbasaryn taǵaıyndaý, sondaı-aq onyń qyzmetin uıymdastyrýdy baqylaýdy júzege asyrý qajet. Investıtsııalyq ombýdsmen kompanııalardyń ótinishterin qaraýmen qatar ınvestorlar úshin ınvestıtsııalyq qyzmet úshin jaǵdaılardy jaqsartý jónindegi ınvestorlardyń usynystaryn qaraýǵa bolatyn dıalog alańyn qurady», - qaýlyda.

Aıta keteıik, Investıtsııalyq ombýdsmen ınstıtýty elimizde jumys isteıtin sheteldik ınvestorlardyń quqyqtary men zańdy múddelerin qorǵaýǵa baǵyttalǵan. Alǵash ret Qazaqstanda ınvestıtsııalyq ombýdsmen qaǵıdaty 2014 jyly «Investıtsııalar týraly» QR Zańyna engizildi. Sol kezde onyń qyzmetin retteıtin ereje ázirlendi. Syrtqy ister mınıstrliginiń túsindirmesine saı, qazir júrgizilip jatqan reformalar men sheteldik ınvestıtsııalardyń aǵynyn eskere otyryp, ınvestıtsııalyq ombýdsmen ınstıtýtyn kúsheıtý qajet. Endi sheteldik ınvestorlarǵa qatysty týyndaǵan aryzdardy memlekettik organ birden sotqa emes, endi engiziletin ınvestıtsııalyq ombýdsmenniń orynbasaryna joldaýy tıis.

«Quny 500 mıllıon teńgeden asatyn ınvestıtsııalyq jobalar boıynsha memlekettik organdar sot talqylaýyna bastamashylyq jasamas buryn, ınvestıtsııalyq ombýdsmenniń orynbasaryna ınvestorǵa shaǵym jáne talap-aryz týraly habarlamalardy joldaıdy», - dep kórsetilgen jańa erejede.

Mınıstrlik bergen túsindirmede bul ınvestıtsııalyq daýlardy baqylaýǵa jáne olarǵa monıtorıngti júrgizýge múmkindik beretini jazylǵan.

«Qazirgi ýaqytta Investıtsııa komıteti men «KAZAKH INVEST» UK» AQ-nyń ınvestorlardyń shaǵymdary men ótinishterin qaraý tájirıbesi memlekettik organdardyń ınvestorlarmen sot talqylaýlarynyń bastalýy týraly ınvestıtsııalar jónindegi ýákiletti organdy mindetti túrde habardar etý týraly talaptardy elemegenin anyqtady. Investorlardyń ınvestıtsııalyq daýlaryn baqylaýdy jáne monıtorıngti qamtamasyz etetin IO orynbasaryn taǵaıyndaý arqyly osy Erejeniń oryndalýyn baqylaýdy qamtamasyz etý qajet», - delingen túsindirmede.

Qujat 27 naýryzǵa deıin kópshilik talqylaýynda bolady.