Investıtsııalyq baǵdarlamany oryndamaǵan «Kókshetaý sý arnasyna» aıyppul salyndy

KÓKShETAÝ. QazAqparat – Kókshetaý qalasynda ınvestıtsııalyq baǵdarlamalardy oryndamaǵan «Kókshetaý sý arnasy» kommýnaldyq kásipornyna iri kólemde aıyppul salyndy, dep habarlaıdy QazAqparat tilshisi.

Aqmola oblysy boıynsha tabıǵı monopolııalar departamenti baspasóz qyzmetiniń málimetinshe, Qazaqstan Respýblıkasy «Tabıǵı monopolııalar týraly» Zańynyń 26-baby 2-tarmaǵynyń 17-tarmaqshasyna sáıkes, tabıǵı monopolııa sýbektisi jyl saıyn, esepti kezeńnen keıingi jyldyń 1 mamyrynan keshiktirmeı, ýákiletti organǵa nemese jergilikti atqarýshy organǵa bekitilgen tarıftik smetanyń oryndalýy týraly, bekitilgen ınvestıtsııalyq baǵdarlamanyń oryndalýy týraly esepterdi, ózge memlekettik organǵa ne memlekettik organǵa usynýǵa, sondaı-aq tabıǵı monopolııa sýbektisi sonymen qatar bekitilgen tarıftik smetany oryndaýǵa, bekitilgen ınvestıtsııalyq baǵdarlamanyń is-sharalaryn oryndaýǵa mindetti.

Alaıda, osy talaptardy buza otyryp, «Kókshetaý sý arnasy» kommýnaldyq kásiporny 2021 jylǵa arnalǵan tarıftik smetada qarastyrylǵan shyǵyndardyń belgili bir baptaryn, bekitilgen ınvestıtsııalyq baǵdarlamanyń is-sharalaryn oryndamaǵan.

«Osyǵan baılanysty, «Kókshetaý sý arnasy» kommýnaldyq kásipornyna qatysty Ákimshilik quqyq buzýshylyq týraly kodeksiniń 164-babynyń 4-bóligi boıynsha aıyppul salý arqyly ákimshilik quqyq buzýshylyq týraly is qozǵaldy. Sýbekt qysqartylǵan tártipte 7 351 200 teńge mólsherinde aıyppul tóledi», - dedi vedomstvodan.

Aıta ketsek, budan buryn Aqmola oblysynda kásipkerge 5 mln teńgedeı zańsyz aıyppul salmaq bolǵan sheneýnikter jazalanǵan edi.