Investıtsııalyq ahýaldy jaqsartý jónindegi keńes salyq saıasaty máselelerin qarady
Salyq salýdyń sheteldik tájirıbesi men onyń qolaıly iskerlik ahýaldy qalyptastyrýdaǵy jáne ekonomıkalyq básekelestikti damytýdaǵy róli, sondaı-aq Qazaqstanda salyqtyq ákimshilendirý men fıskaldy saıasattyń ilgerlemeli ádisterin iske asyrý boıynsha usynystar týraly Qazaqstanda akkredıttelgen Ulybrıtanııa elshisi M. Gıfford, Kanada elshisi N. Brýsso, Eýropalyq odaq elshisi Sven-Olov Karlsson, AQSh elshiliginiń isterindegi ýaqytsha senimdi ókil T. Lıýng, sondaı-aq ınvestıtsııalyq qaýymdastyqtyń – EY, Deloitte, PwC, Heidelberg Cement kompanııalarynyń ókilderi baıandady.
Qazaqstanda júrgizilip jatqan salyqtyq ákimshilendirý reformasy týraly QR ulttyq ekonomıka mınıstri R. Dálenov, qarjy birinshi vıtse-mınıstri B. Sholpanqulov sóıledi.
«2019 jyldyń qorytyndysy boıynsha Qazaqstannyń JІÓ 4,5%-ǵa ósti. Ósim negizinen shıkizattyq emes salalar – qurylys (12,9%), saýda (7,6%), kólik (5,1%), óńdeý ónerkásibi (4,4%) esebinen qamtamasyz etildi. Elge tartylǵan tikeleı sheteldik ınvestıtsııalar kólemi $25 mlrd deıin ulǵaıdy. Halyqtyń naqty tabysy 5,5%-ǵa artty, ınflıatsııa josparly dálizde saqtalyp, 5,4% qurady. Álemdik ekonomıkanyń kezeńdik báseńdeýi men Qytaıdaǵy ahýalǵa baılanysty táýekelder jaǵdaıynda belgilengen damý trendin saqtaý men nyǵaıtý bizdiń basymdyǵymyz bolyp qala beredi», — dedi A. Mamın.
Premer-Mınıstr ekonomıkalyq ósimdi qamtamasyz etýdegi, iskerlik ahýaldy jaqsartýdaǵy, halyqtyń jumyspen qamtylýyn arttyrýdaǵy jáne ınvestıtsııa tartýdaǵy tıimdiligin arttyrý maqsatynda QR-da júrgizilip jatqan salyq júıesiniń reformasy týraly aıtyp berdi.
«Biz Qazaqstannyń halyqaralyq pozıtsııasyn naqty ári aıqyn salyq júıesi bar, senimdi jáne boljamdy ınvestıtsııalyq baǵyt retinde odan ári nyǵaıtý týraly usynystardyń tıimdi oryndalýyn qamtamasyz etemiz», — dep túıindedi A. Mamın.
