NUR-SULTAN. QazAqparat - QR Premer-Mınıstri Asqar Mamınniń tóraǵalyǵymen ótken Investıtsııalyq ahýaldy jaqsartý jónindegi keńes (IAJK) otyrysynda Qazaqstanda salyq reformasyn iske asyrý máseleleri qaraldy. Bul týraly QazAqparat Úkimettiń baspasóz qyzmetine silteme jasap habarlaıdy.
QR-daǵy salyq saıasatyn jetildirý perspektıvalary, korporatıvtik salyq salýdyń jahandyq strategııalary jáne olardyń qolaıly ınvestıtsııalyq ahýaldy qalyptastyrýdaǵy róli týraly Qazaqstanda akkredıttelgen Kanada elshisi Nıkolıa Brýsso, Eýropalyq Odaq elshisi Sven-Olov Karlsson, AQSh isterindegi ýaqytsha senimdi ókil Teodor Lıng, Ulybrıtanııa isterindegi ýaqytsha senimdi ókil Djonatan Leıfıld, sondaı-aq EY, Exxon Mobil, Deloitte jáne t. b. kompanııalardyń ókilderi baıandama jasady. Qazaqstan tarapynan ulttyq ekonomıka mınıstri Áset Erǵalıev pen qarjy vıtse-mınıstri Qanat Baedilov túsinikteme berdi. Sheteldik ókilder Qazaqstannyń salyqtyq ákimshilendirý reformasyn júrgizý boıynsha qabyldap jatqan sharalaryna oń baǵa berdi, sondaı-aq QR fıskaldyq júıesin odan ári jańǵyrtý boıynsha birqatar usynystar aıtty.
«2021 jyldyń birinshi toqsanynda QR ekonomıkasynyń naqty sektory qarqyndy damydy. Ósim óńdeý ónerkásibinde (+7,5%), qurylysta (+13,1%) jáne aýyl sharýashylyǵynda (+2,8%) baıqaldy. Negizgi kapıtalǵa salynǵan ınvestıtsııalardyń ósýi taý-ken óndirisin esepke almaǵanda 34% qurady. Saýda men kólik salasyn qosa alǵanda, kórsetiletin qyzmetter sektorynda da oń dınamıka baıqalady», — dedi A. Mamın.
Premer-Mınıstr Úkimettiń daǵdarysqa qarsy qabyldaǵan sharalary nátıjesinde HVQ-nyń álemdik ekonomıkaǵa sáýir aıynda jasaǵan sholýynda 2021 jyly Qazaqstannyń JІÓ ósiminiń boljamy 3,0%-dan 3,2%-ǵa deıin jaqsarǵanyn atap ótti. Moody's, Fitch jáne Standard&Poor's jetekshi reıtıng agenttikteri de pandemııaǵa deıingi reıtıngterdi rastady jáne Qazaqstan ekonomıkasynyń damýynda 3,2-3,8% aralyǵyndaǵy oń boljamyn jasady.
«Reformanyń nátıjesinde salyq júıesi neǵurlym ıkemdi bolady jáne QR ekonomıkasyna ishki jáne syrtqy ınvestıtsııalardy tartý kólemin odan ári arttyrýǵa yqpal etedi. Biz Qazaqstannyń aıqyn ári ashyq salyq júıesi bar senimdi jáne boljamdy memleket retindegi halyqaralyq ustanymyn odan ári nyǵaıtý boıynsha usynymdardyń tıimdi oryndalýyn qamtamasyz etemiz», — dep túıindedi A. Mamın.
