Investıtsııalyq ahýaldy jaqsartý reıtıngi boıynsha Qazaqstan 190 eldiń ishinde 9-oryndy ıelendi - Mámı
Іs-sharaǵa Prezıdent Ákimshiligi Memlekettik-quqyq bóliminiń meńgerýshisi Álııa Raqysheva, Joǵarǵy Sottyń sýdıalary, oblystyq jáne oǵan teńestirilgen sottar tóraǵalary, Astana qalasynyń sýdıalary, Joǵarǵy Sot janyndaǵy Sottardyń qyzmetin qamtamasyz etý departamentiniń jáne Joǵarǵy Sot janyndaǵy Sot tóreligi akademııasynyń basshylyǵy qatysty.
Otyrysqa qatysýshylar Keńestiń 2016 jylǵy jumys josparynyń oryndalýyn, sondaı-aq sot tóreliginiń ózekti máseleleri boıynsha jumys toptarynyń qyzmetin talqylady.
Otyrysty asha kele, Joǵarǵy Sot Tóraǵasy Qaırat Mámı «100 naqty qadam» Ult Josparyn oryndaý sheńberinde elimizdiń sot júıesinde júzege asyrylǵan aıtýly ózgeristerge sáıkes qurylǵan Halyqaralyq keńestiń alǵashqy jylǵy jumysynyń aıaqtalǵandyǵyn atap ótti. Zań ústemdigin qamtamasyz etýge baǵyttalǵan reformalar, sonyń ishinde jeke ınvestıtsııalyq sot óndirisin qurý, Joǵarǵy Sottyń mamandandyrylǵan sot alqasy men Joǵarǵy Sot janyndaǵy Halyqaralyq keńestiń jumys isteýi Qazaqstandaǵy ınvestıtsııalyq ahýaldyń jaqsarýyna zor úles qosty. Máselen, aǵymdaǵy jylǵy qazan aıynda EYDU uıymynyń Investıtsııa komıtetiniń otyrysynda respýblıkanyń ınvestıtsııalyq saıasatynyń ekinshi sholý baıandamasynyń tanystyrylymy qorytyndysynda Qazaqstandy osy uıymǵa qatysýshy retinde shaqyrý týraly sheshim qabyldandy. Qazirgi tańda Qazaqstannyń osy Komıtetke kirýi jáne Investıtsııalar jónindegi Halyqaralyq deklaratsııaǵa qosylýy jóninde kelissózder júrgizilýde.
«Búkilálemdik banktiń bıznesti júrgizý jáne ınvestıtsııalyq ahýaldy jaqsartý reıtıngisi boıynsha Qazaqstan aǵymdaǵy jyly 190 eldiń ishinde 9-oryndy ıelengenin qýanyshpen atap ótkenimiz jón. Bul týraly keshegi sýdıalar sezinde de aıtylǵan bolatyn», - dedi Q.Mámı.
Joǵarǵy Sot pen Astana qalalyq soty ótken 10 aı ishinde sheshim qabyldaı otyryp, ınvestorlardyń qatysýymen 20 azamattyq isti qarady. Joǵarǵy Sot apellıatsııalyq tártippen 18 isti qarady. Mamandandyrylǵan sot alqasynyń suranysy boıynsha Azamattyq protsestik kodekstiń 77-babyna sáıkes Halyqaralyq keńestiń músheleri 7 qorytyndy, sondaı-aq óz quzyreti sheńberinde basqa da ózekti máseleler boıynsha usynystar berdi. Osyǵan oraı Q.Mámı alǵashqy ınvestıtsııalyq daýlar boıynsha saraptamalyq pikir ázirleýge belsendi qatysqany úshin Halyqaralyq keńes múshelerine alǵysyn bildirdi.
Joǵarǵy Sot Tóraǵasy Qazaqstan Respýblıkasynyń 2010 - 2020 jylǵa deıingi kezeńge arnalǵan Quqyqtyq saıasat tujyrymdamasynda elimizde ákimshilik ádilet júıesin qurý kózdelgenin jáne sýdıalardyń altynshy sezinde Prezıdenttiń Ákimshilik protsestik kodeksti ázirleý týraly tapsyrma bergenin eske saldy.
Joǵarǵy Sot ázirlegen tıisti zań jobasy ınternet-resýrsta ornalastyryldy jáne Keńestiń barlyq múshelerine joldandy. Keńes múshesi Iorg Pýdelkanyń belsendi qatysýynyń arqasynda aǵymdaǵy jyldyń qyrkúıeginde ÁPK boıynsha vedomstvoaralyq jumys toby músheleriniń osy baǵyttaǵy nemis sottarynyń tájirıbesimen tanysý maqsatynda arnaıy sapary oryn aldy.
ÁPK jobasynyń tujyrymdamalyq qaǵıdattaryna toqtalǵan Joǵarǵy Sottyń mamandandyrylǵan sot alqasynyń tóraǵasy Aıgúl Qydyrbaevanyń aıtýynsha, «tıimdi jumys isteıtin ákimshilik ádilet júıesin qurý «Qazaqstan-2050» strategııasynyń basty baǵyttarynyń biri bolyp tabylady jáne halyqaralyq reıtıngtegi pozıtsııamyzdy jaqsartýǵa yqpal etedi. Ákimshilik ádilet júıesi memlekettik apparat qyzmetiniń tıimdiligin aıtarlyqtaı deńgeıde arttyrady, azamattar men zańdy tulǵalardyń quqyqtary men zańdy múddelerin ýaqtyly ári sapaly qorǵaýdy qamtamasyz etedi, ekonomıkalyq jáne ınvestıtsııalyq ahýaldy jaqsartýǵa áser etedi».
«Sheteldik ınvestorlar men otandyq kásipkerlerge memlekettik organdar sheshimderiniń durystyǵyn tekserý úshin naqty quqyqtyq negizder kerek, bulardy saqtaý táýelsiz ákimshilik sottar tarapynan qamtamasyz etilýi tıis. I.Pýdelka zań jobasyna joǵary baǵa bere kele, bul joba zamanaýı álemdik tájirıbege saı keletindegin atap ótken bolatyn», - dedi A.Qydyrbaeva. Reformany odan ári tıimdi jalǵastyrý, sot praktıkasy máselesindegi sabaqtastyqty saqtaý, kadrlyq aqtalmaǵan ózgeristerdi jáne aýqymdy qarjylyq shyǵyndy boldyrmaý maqsatynda ákimshilik sot isin júrgizýdiń ótpeli modelin qoldanǵan jón. Áńgime jarııa-quqyqtyq daýlardy qoldanystaǵy ákimshilik sottarǵa bere otyryp, olardyń ákimshilik quqyqbuzýshylyqtar týraly isterdi qaraý boıynsha jekelegen quramyn saqtaý týraly bolyp otyr.
Keńes músheleri otyrysta ınvestıtsııalyq daýlardy qaraý jónindegi halyqaralyq tájirıbe, otandyq sottardyń azamattyq ister jónindegi sheteldik sottarmen jáne arbıtrajdarmen ózara is-qımyly, daýlardy sheshýdiń balamaly tásilderin damytý, shetel tájirıbesi negizinde sot bilimin berý baǵdarlamasy, zııatkerlik menshik quqyǵyn qorǵaý boıynsha daýlardy sheshý, sondaı-aq aqparattyq tehnologııalardy sotta damytýdyń sheteldik tájirıbesin zerdeleý qorytyndylary týraly baıandamalar jasady.
Eske sala keteıik, Keńes quramyna Dýbaı halyqaralyq qarjy ortalyǵynyń sottar tirkeýshisi, «Beıker ı Makenzı - Sı-Aı-Es Lımıted» kompanııasy fılıalynyń dırektory, «Sheteldik ınvestorlardyń qazaqstandyq keńesi» qaýymdastyǵy basqarmasynyń hatshysy Kýrtıs Masters, Koreıa Respýblıkasynyń «ıÝlchon» zań kompanııasynyń advokaty Hvachjýn Lı jáne Kaspıı qoǵamdyq ýnıversıtetiniń professory Anatolıı Dıdenko jáne t.b. kiredi.
Keńesti Qazaqstan Joǵarǵy Sotynyń Tóraǵasy basqarady. Onyń músheleri bir jyl merzimge saılanady. Otyrys jylyna keminde eki ret ótedi.
Otandyq sot tóreligi júıesi jetildirý máseleleri boıynsha sarapshylyq konsýltatsııalar ázirleýge baǵyttalǵan Keńes Ult Josparynyń 25-qadamyn is júzinde oryndaý bolyp tabylady.
