Investıtsııalar jáne damý vıtse-mınıstri Pákistan elshisimen ekijaqty yntymaqtastyq máselelerin talqylady
ASTANA. QazAqparat - QR Investıtsııalar jáne damý vıtse-mınıstri Arystan Qabykenov Pákistan Islam Respýblıkasynyń Ókiletti Elshisi Abdýl Salık Hanmen kezdesý ótkizdi. Kezdesý barysynda taraptar ınvestıtsııa, kólik jáne logıstıka, avıatsııa jáne taǵy basqa birqatar ekijaqty yntymaqtastyq máselelerin talqylady.
Bul týraly QR SІM baspasóz qyzmeti habarlady.
Taraptar saýda-ekonomıkalyq yntymaqtastyqtyń oń dınamıkasyn sóz etti. Qazaqstan men Pákistan arasyndaǵy taýar aınalym 2018 jyldyń 1-toqsanynda 14,9 mln. AQSh dollaryn qurady. Bul 2017 jyldyń sáıkes kezeńindegi kórsetkishten 13,7%-ǵa joǵary.
Aıta keteıik, Qazaqstan men Pákistan arasyndaǵy taýar aınalym 2017 jyly 28,4 mln. dollar, al, 2016 jyly 25,6 mln. AQSh dollaryn quraǵan bolatyn.
Sondaı-aq, taraptar ınvestıtsııalyq yntymaqtastyqtyń da oń dınamıkasy baryn tilge tıek etti. Pákistannyń Qazaqstan ekonomıkasyna salǵan ınvestıtsııasynyń aǵyny sońǵy 13 jylda 27,4 mln. AQSh dollaryna jetti. Sonymen birge, eki eldiń saýda-ekonomıkalyq yntymaqtastyqty keńeıtýde paıdalanylmaǵan áleýeti bar ekeni atap ótildi.
Osyǵan baılanysty, Mınıstrliktiń Pákistan tarapyna ótken jyldyń tamyz aıynda qaraýǵa ázirlengen Qazaqstan Respýblıkasy men PIR arasyndaǵy ekijaqty yntymaqtastyqtyń Jol kartasyn júzege asyrý ekijaqty ekonomıkalyq qatynastardyń damýyna qosymsha serpin beredi. Atap aıtqanda, Gvadar/Karachı porttary arqyly Pákistannan júkterdi tasymaldaý kezinde tranzıttik jáne kólik salasynda, sondaı-aq Parsy jáne Oman Parsy shyǵanaǵy elderiniń iri kólik torabyna aınalatyn Iran Bandar-Abbas portynda birlesken termınal qurýǵa baǵyttalǵan.
Qazirgi ýaqytta Irannyń temirjol ınfraqurylymy «Qazaqstan-Túrikmenstan-Iran» temirjol jelisi arqyly Pákistanǵa júk tasymaldaýǵa múmkindik beredi. Degenmen, búgingi kúni Pákistanǵa jáne Pákistannan tasymaldaý júzege asyrylmaıdy.
