«Investıtsııalar týraly» Qazaqstan Respýblıkasynyń Zańyna ózgerister engizý usynylýda
ASTANA. QazAqparat - QR Ekonomıka jáne bıýdjettik josparlaý mınıstri Erbolat Dosaev Elbasynyń ınvestorlarǵa arnalǵan jańa yntalandyrýlar toptamasyn engizý boıynsha tapsyrmasyn oryndaý maqsatynda usynylyp otyrǵan sharalardy jarııalady.
«Birinshi kezektegi sharalar retinde, ınvestorlarmen ınvestıtsııalyq kelisimsharttar jasasý tetikterin qaıta qaraý bóliminde «Investıtsııalar týraly» Qazaqstan Respýblıkasynyń Zańyna ózgerister engizý usynylyp otyr. Birinshiden, memlekettik qoldaýdyń qosymsha sharalaryn engizý eskerilýde. Osy oraıda nysandy iske qosqannan keıin memleket tarapynan kúrdeli qarjy shyǵyndarynyń 30 paıyzyna deıin óteý boıynsha ınvestıtsııalyq sýbsıdııa, korporatıvti tabys salyǵyn tóleýden 10 jylǵa deıin merzimge bosatý, ulttyq holdıngter, ulttyq kompanııalar jáne memlekettik mekemeler tarapynan ınvestorlardyń taýarlary men qyzmetterine uzaq merzimdi kepildi tapsyrys qarastyrylmaq», -dedi mınıstr búgin Ortalyq kommýnıkatsııalar qyzmetindegi brıfıngte.
Sonymen qatar salyq, kóshi-qon, ekologııalyq saladaǵy zańnamanyń «turaqtylyq» qaǵıdatyn jáne uzaq merzimdi kezeńge boljamdy rettelmeli tarıfter men baǵalardy engizý kózdelmek. Buǵan qosa, QR Indýstrııa jáne jańa tehnologııalar mınıstrliginiń Investıtsııa komıtetine ınvestorlardyń ótinimderi boıynsha ruqsattamalyq qujattar jáne aqparat berýdi úılestirý jónindegi fýnktsııalardy berý arqyly ınvestorlar úshin «bir tereze» qaǵıdatyn engizý usynylýda.
