Investıtsııalar mınıstrliginiń basqarma basshysy 8 jylǵa sottaldy
«Sybaılas jemqorlyqqa qarsy qyzmettiń buryn aıaqtalǵan qylmystyq isteri boıynsha 11 tulǵaǵa qatysty 11 aıyptaý úkimi shyqty, olardyń 5 – i ártúrli deńgeıdegi basshylar. Sonymen qatar, laýazymdy tulǵalarǵa para berý faktisi boıynsha 4 tulǵa, alaıaqtyq faktisi boıynsha 2 tulǵa sottaldy» - deıdi Agenttiktiń asa mańyzdy ister jónindegi tergeýshisi Danııar Bıǵaıdarov.
Onyń aıtýynsha, 2 tulǵa bas bostandyǵynan aıyrylsa, 3 tulǵanyń bas bostandyǵyna shekteý qoıyldy, 6-yna eselengen aıyppuldar salyndy. Aıyppuldyń jalpy somasy 30,4 mln teńgeni qurady.
«2020 jylǵy 27 tamyzda «Baıqońyr» aýdanynyń №2 sotynyń úkimimen para alýdyń 6 epızody boıynsha Qazaqstan Respýblıkasy Investıtsııalar jáne ınnovatsııalyq damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń memlekettik sáýlet-qurylys baqylaý basqarmasynyń basshysy A.A. Lı sottalyp, oǵan 8 jyl bas bostandyǵynan aıyrý jazasy taǵaıyndaldy. Onymen birge ártúrli somadaǵy aıyppulǵa para berýshiler men deldal sottaldy. Ol tehnıkalyq qadaǵalaý jáne tekserý boıynsha akkredıtteý týraly kýálik alýǵa kómek kórsetkeni úshin qurylys salasyndaǵy kásipkerlik sýbektilerinen júıeli túrde para aldy degen kúdikke ilindi», - deıdi ol.
Alynǵan paranyń jalpy somasy 6 mln 180 myń teńgeni quraǵan. Sot úkimi zańdy kúshine engennen keıin Sybaılas jemqorlyqqa qarsy qyzmettiń sybaılas jemqorlyq táýekelderin joıý, kináli adamdardy jaýapkershilikke tartý jáne zańsyz berilgen barlyq kýálikterdi qaıtaryp alý jónindegi usynysy qaralatyn bolady.
