Investıtsııa úshin tartymdy úzdik úsh sala
ASTANA. QazAqparat - Qazaqstanda munaı ónimderin óndirý salasynda 200 mlrd teńgeden astam ınvestıtsııa salyndy. Bul osydan bir jyl burynǵy kórsetkishten 80 paıyzdan astam kóp, dep habarlaıdy QazAqparat energyprom.kz saıtyna silteme jasap.
Aǵymdaǵy jyldyń birinshi jartyjyldyǵynyń qorytyndysynda qaıta óńdeý salasyndaǵy negizgi kapıtalǵa salynǵan ınvestıtsııa kólemi jyldan jylǵa 7,2 paıyzǵa ósip, 411,1 mlrd teńgege jetti. Bul Qazaqstan boıynsha jalpy ınvestıtsııalyq kólemniń 15,5 paıyzyn jáne ónerkásiptegi barlyq ınvestıtsııanyń 22 paıyzyn quraıdy. Atalǵan ınvestıtsııanyń 60 paıyzdan astamy úsh negizgi munaıdy qaıta óńdeıtin óńirlerge tıesili. Atap aıtqanda, Atyraý oblysyna 115,3 mlrd teńge, Pavlodar oblysyna 76 mlrd teńge jáne Ońtústik Qazaqstan oblysyna 59,1 mlrd teńge salyndy.
Búgingi kúni respýblıkadaǵy munaı óńdeý zaýyttaryn jańǵyrtý jumystary júrgizilip jatyr. Atyraý zaýyty jańǵyrtylǵannan keıin jyldyq qýaty 5-ten 5,5 mln tonnaǵa deıin artady. Avtomobıl benzınin óndirý jylyna 1745 myń tonnaǵa deıin, dızel otyny 1640 myń tonnaǵa deıin, avıa kerosın 244 myń tonnaǵa deıin ulǵaıady. Al búgingi kúni Shymkent munaı óńdeý zaýytyn jańǵyrtý jumystary aıaqtalǵan. Pavlodar munaı-hımııa zaýytynda jańǵyrtý jumystary aıaqtalýǵa jaqyn. Zaýyt tolyq iske qosylǵannan keıin joǵary oktandy benzın shyǵarý kólemi jylyna 297 myń tonnaǵa artatyn bolady.
Investıtsııa úshin tartymdy salalardyń qataryna metallýrgııa ónerkásibi de bar. Aıta keterligi, metallýrgııaǵa salynatyn ınvestıtsııa kólemi qysqarǵanymen daıyn metall buıymdaryn óndirý salasyna quıylatyn qarjy kólemi bir jyldyń ishinde 81,3 paıyzǵa artyp, 8,1 mlrd teńgeni qurady. Al mashına jasaý salasyna salynǵan ınvestıtsııa kólemi 4 esege artyp, 24,2 mlrd teńgege jetip otyr.
Úzdik úshtikti tamaq ónerkásibi tuıyqtaıdy. 2017 jyldyń birinshi jartysynda bul salaǵa salynǵan ınvestıtsııanyń 55,1 paıyzy (226,6 mlrd teńge) bıznestiń óz qarjysy. Al qalǵandary - bank nasıeleri (129 mlrd teńge) men basqa zaem qarajattar (55,5 mlrd teńge).
