Investıtsııa tartýdyń jańa júıesiniń ereksheligi nede

NUR-SULTAN. QazAqparat - 2018 jyldyń qorytyndysynda Qazaqstan ekonomıkasyna 24,3 mlrd dollar tikeleı shetel ınvestıtsııasy tartyldy. Bul týraly búgin QR Syrtqy ister mınıstriniń orynbasary Ermek Kósherbaev aıtty, dep habarlaıdy QazAqparat tilshisi.

«Qazaqstan búgingi kúni tartylǵan tikeleı sheteldik ınvestıtsııa kólemi boıynsha Ortalyq Azııada kósh bastap otyr. Táýelsizdik jyldary ishinde Qazaqstan ekonomıkasyna 320 mlrd AQSh dollarynan astam tikeleı sheteldik ınvestıtsııa tartyldy. 2018 jyly ınvestıtsııanyń jalpy aǵyny ótken jylmen salystyrǵanda 15,8 paıyzǵa ósip, 24,3 mlrd AQSh dollaryn qurady», - dedi mınıstr orynbasary Úkimet úıinde ótken baspasóz máslıhatynda.

Osy rette ol ınvestıtsııa tartý jańa jumys oryndaryn quryp, qazaqstandyq kadrlardyń áleýetin arttyratynyn, ınnovatsııalyq tehnologııalardyń transfertine túrtki bolatynyn, memleket bıýdjetine salyq túsimderin ulǵaıtatynyn basa aıtty. Sonymen qatar, ınvestıtsııa tartýdyń jańa júıesiniń buǵan deıin qoldanysta bolǵan júıeden aıyrmashylyǵyna keńinen toqtaldy.

«Birinshiden, biz sheteldegi mekemelermen ózara is-qımyldy kúsheıtip, ınvestıtsııa tartýdyń negizgi quraldarynyń biri retinde atalǵan ınfraqurylymdardy paıdalanamyz. ıAǵnı, bizdiń tolyqtaı alǵanda shetelde 93 mıssııamyz bar. Onyń ishinde 58-i - elshilik bolsa, qalǵandary - dárejesi tómendeý dıplomatııalyq mıssııalar. Olardyń barlyǵy da jańa ınvestıtsııa tartýmen jáne eksporttyq saıasatty úılestirýmen belsendi jumys júrgizip jatyr. Biz sheteldik mekeme-ortalyq-óńir formatynda úsh deńgeıli júıe qurdyq. Ol barlyq deńgeıdegi árbir ınvestormen jáne jobamen naqty jumys isteýge múmkindik beredi. Mundaı tetik óńirlerdiń jobalary úshin sheteldik mekemelerge áleýetti ınvestor izdeýge jáne kerisinshe tikeleı tasymaldaýǵa múmkindik beredi», - dedi Ermek Kósherbaev.

QR SІM orynbasarynyń aıtýynsha, ekinshiden, áleýetti ınvestor elderdi qamtý geografııasy keńeıedi. Bul rette Qazaqstan ekonomıkasynyń basym sektoryna ınvestıtsııa tartý úshin 40 ınvestor el aıqyndalǵan. Bul rette aldyńǵy qatarly elderge, ásirese AQSh, Germanııa jáne Japonııaǵa basa nazar aýdarylady. Úshinshiden, ınvestıtsııalyq sharalar uıymdastyrylady. Máselen, jyl basynan beri 17 ınvestıtsııalyq shara uıymdastyryp, birqatar mańyzdy strategııalyq qujattarǵa qol qoıyldy.

«Tórtinshiden, biz barlyq óńirlerde front-keńseler qurý jumysyn júrgizemiz. Onda ruqsat berý boıynsha barlyq jaýapty organdar bir alańǵa jınalatyn bolady», - dedi ol.