Investıtsııa tartýda Túrkistan men Aqmola oblystary basqa óńirlerden alda keledi
«Qańtar-sáýirde syrtqy saýda aınalymy 28,2 mlrd dollardy qurady. Eksport 18,4 mlrd dollardy, ımport 9,8 mlrd dollardy kórsetti. Saýda balansynyń oń saldosy ótken jylǵy qańtar-sáýirmen salystyrǵanda 4,0%-ǵa ulǵaıdy», - dedi Úkimet otyrysynda baıandama jasaǵan Ulttyq ekonomıka mınıstri Rýslan Dálenov.
Mınıstr keltirgen málimetke sáıkes ónerkásip óndirisi 4,8%-ǵa ulǵaıǵan.
«Ósim óńirlerdiń kóbinde baıqalady. Eń joǵary ósimdi Atyraý (14,1%) jáne Qostanaı (11,2%) oblystary kórsetti. 4 óńirde tómendeý tirkeldi. Bul Qyzylorda (-11,1%), Aqtóbe (-1,7%), Mańǵystaý (-1,6%) oblystary jáne Shymkent qalasy (-3,9%)», - dedi ol.
Rýslan Dálenov óńdeý ónerkásibinde óndiris ósip kele jatqanyn atap ótti. Ósim bul baǵytta 4,9%-da quraǵan.
«Farmatsevtıka (21,2%-ǵa), mashına jasaý (ósý 18,5%-ke), qurylys materıaldaryn óndirý (12,3%-ǵa) jáne jeńil ónerkásip (10,8%-ǵa) ósimniń joǵary qarqyndaryn kórsetti. Óńirler boıynsha joǵary ósim Qostanaı (21,1%-ǵa), Túrkistan (16,3%-ǵa), Qyzylorda (13,4%-ǵa) jáne Atyraý (12,1%-ǵa) oblystarynda baıqalady.5 óńirde tómendeý tirkeldi. Bul Aqtóbe (-5,3%), Mańǵystaý (-3,7%), Jambyl (-2%), Shyǵys Qazaqstan (-0,5%), oblystarynda jáne Shymkent qalasy (-4,9%)», - deıdi Rýslan Dálenov.
Mınıstr sondaı-aq ınvestıtsııalar boıynsha 15 óńir ósimdi kórsetkenin jetkizdi.
«Túrkistan oblysynda ınvestıtsııa 2 esege jýyq, Aqmola oblysynda – úshten birge ósti. 2 óńirde tómendeý tirkeldi. Bul Qyzylorda (-49,1%) jáne Atyraý (-11,1%) oblystary. Jalpy, negizgi kapıtalǵa salynǵan ınvestıtsııalardyń ósýi 0,1%-dy qurady», - deıdi Rýslan Dálenov.
