Investıtsııa tartýda 11 elmen is-qımyl jospary ázirlenedi - QR IDM
ASTANA. QazAqparat - Investıtsııa tartýda basymdyqqa ıe 11 elmen is-qımyl jospary ázirlenedi. Bul týraly búgin Úkimet úıinde ótken baspasóz máslıhatynda QR IDM Investıtsııa komıteti tóraǵasynyń orynbasary Larısa Jumaǵalıeva aıtty, dep habarlaıdy QazAqparat.
Memleket basshysynyń tapsyrmasyna sáıkes elimizdiń Ulttyq ınvestıtsııalyq strategııasy qabyldanǵanyn aıtqan ol: «Strategııada ınvestıtsııa tartý úshin basymdyqty elder anyqtaldy. Ekonomıkalyq múmkinshilikteri eskerile otyryp, álemniń 36 áleýetti eli anyqtaldy. Olardyń ishinde AQSh, Reseı, Ulybrıtanııa, Germanııa, Frantsııa, Italııa, Qytaı syndy eń basym 11 el bar. Osy basymdyqty elderdiń árqaısysymen jumys isteý úshin Syrtqy ister mınıstrligimen birge jeke tásildemeler men naqty is-qımyl josparlary ázirlenetin bolady»,- dedi.
Jalpy onyń sózine qaraǵanda, úsh jyldyq quldyraýdan keıin 2016 jyly Qazaqstan ekonomıkasyna salynǵan tikeleı shetel ınvestıtsııasynyń kólemi aıtarlyqtaı ósip, 21 mlrd dollardy quraǵan.
«Bul 2015 jylmen salystyrǵanda 41,5 paıyzǵa joǵary. Dál osyndaı tendentsııa aǵymdaǵy jyly da baıqalady. Máselen, osy jyldyń birinshi jartyjyldyǵyn alyp qaraıtyn bolsaq, onda Qazaqstanǵa quıylǵan tikeleı shetel ınvestıtsııasynyń jalpy kólemi 10,5 mlrd dollardy qurady. Bul ótken jyldyń sáıkes kezeńimen salystyrǵanda 8,6 paıyzǵa joǵary bolyp otyr. Taý-ken ónerkásibi salasyna quıylǵan tikeleı shetel ınvestıtsııasy 2,2 esege artyp, óńdeý ónerkásibinde - 46,7, kólik salasynda 10,3 paıyzǵa ósti», - dedi Larısa Jumaǵalıeva.
